بالی ووڈ کے بادشاہ، شاہ رخ خان کے فلم کی شوٹنگ کے دوران زخمی ہونے کی خبروں پر نیا مؤقف سامنے آ گیا ہے۔
گزشتہ دنوں بھارتی میڈیا میں یہ رپورٹ گردش کر رہی تھی کہ شاہ رخ خان ممبئی کے گولڈن ٹوبیکو اسٹوڈیو میں اپنی نئی فلم ’کنگ‘ کے ایکشن سین کی شوٹنگ کے دوران زخمی ہوگئے ہیں اور علاج کے لیے انہیں امریکا بھیجا گیا ہے۔
تاہم اب این ڈی ٹی وی اور دیگر معتبر ذرائع نے ان اطلاعات کو بے بنیاد قرار دیتے ہوئے واضح کیا ہے کہ ایسی کسی چوٹ کا کوئی ثبوت موجود نہیں، اور یہ تمام خبریں افواہوں پر مبنی ہیں۔
ذرائع کا کہنا ہے کہ اگرچہ شاہ رخ خان کو ماضی میں فلموں کی شوٹنگ کے دوران کچھ چوٹیں لگی تھیں، جن کا علاج وہ وقتاً فوقتاً کرواتے رہتے ہیں، لیکن حالیہ امریکا روانگی اسی سلسلے کی ایک معمول کی میڈیکل وزٹ تھی۔
مزید بتایا گیا کہ شاہ رخ جولائی کے دوسرے ہفتے میں امریکا روانہ ہوئے تھے اور امکان ہے کہ وہ ماہ کے اختتام تک واپس آ جائیں گے۔
فلم ’کنگ‘ شاہ رخ خان کا ایک بڑا پراجیکٹ ہے جس میں وہ اپنی بیٹی سہانا خان کے ساتھ پہلی بار اسکرین پر نظر آئیں گے، جب کہ فلم کی دیگر کاسٹ میں دپیکا پڈوکون، رانی مکھرجی، ابھیشیک بچن، انیل کپور، ارشد وارثی، جیکی شروف اور دیگر معروف اداکار شامل ہیں۔
