ایک برطانوی ٹیکنالوجی کمپنی نے دنیا کی سب سے تیز رفتار الیکٹرک سکوٹر “ٹربو” متعارف کروا دی ہے، جو 100 میل فی گھنٹہ (تقریباً 160 کلومیٹر فی گھنٹہ) کی رفتار سے دوڑنے کی صلاحیت رکھتی ہے۔
اس ای-سکوٹر کو کمپنی “بو” (Bo) نے تیار کیا ہے اور وہ اسے “مونسٹر” یعنی دیو قرار دیتی ہے۔ کمپنی کے سی ای او آسکر مورگن کا کہنا ہے کہ جب ان کی ٹیم اس پروجیکٹ پر کام کر رہی تھی، تو انہیں جلد ہی اندازہ ہو گیا کہ وہ ایک عام سکوٹر نہیں بلکہ ایک طاقتور مشین تخلیق کر رہے ہیں۔
آسکر کے مطابق، ای-سکوٹرز شہری نقل و حرکت کے انداز میں تبدیلی لا رہے ہیں، لیکن اب تک انہیں روایتی آٹو موٹیو کلچر میں مرکزی حیثیت حاصل نہیں ہو سکی۔ تاہم “ٹربو” کو اسی کمی کو پورا کرنے کے لیے تیار کیا گیا ہے، تاکہ برقی گاڑیوں کو پرفارمنس کے اعتبار سے بھی اعلیٰ مقام حاصل ہو۔
تقریباً 18 ماہ کی محنت سے تیار ہونے والے اس سکوٹر کی ابتدائی قیمت 29,500 امریکی ڈالر رکھی گئی ہے۔ “ٹربو” میں جدید ٹیکنالوجی پر مبنی 24,000 واٹ کا ڈوئل موٹر پروپلژن سسٹم نصب ہے، جبکہ اسے طاقت فراہم کرنے کے لیے 1800 واٹ آور کی بیٹری استعمال کی گئی ہے، جو ایک وقت میں 1500 آئی فونز کو فاسٹ چارج کرنے کے لیے بھی کافی ہے۔
یہ سکوٹر نہ صرف رفتار میں بے مثال ہے بلکہ طاقت، پرفارمنس اور جدید ڈیزائن کے لحاظ سے بھی ایک منفرد پیش رفت قرار دی جا رہی ہے۔
