امریکی ایرو اسپیس کمپنی “اسکائی ڈویلر ایرو” نے فرانس کی دفاعی ٹیکنالوجی کی کمپنی “تھیلیز” کے اشتراک سے ایک ایسا جدید جاسوس ڈرون تیار کیا ہے جو بغیر رکے مسلسل تین ماہ تک پرواز کی صلاحیت رکھتا ہے۔
یہ ہلکا پھلکا مگر انتہائی مضبوط ڈرون مکمل طور پر کاربن فائبر سے تیار کیا گیا ہے، جو نہ صرف سمندر پر نظر رکھنے کے لیے ڈیزائن کیا گیا ہے بلکہ طویل فضائی مشنز کے لیے بھی نہایت موزوں ہے۔
تخلیق کاروں کے مطابق یہ ڈرون سورج کی توانائی استعمال کرتا ہے، جس کی بدولت اسے روایتی ایندھن یا زمینی اسٹاپ کی ضرورت پیش نہیں آتی۔ آزمائشی پروازوں میں یہ ثابت ہوا کہ یہ جاسوس طیارہ مسلسل 90 دنوں تک پرواز کر سکتا ہے، جو موجودہ فوجی ڈرونز کے مقابلے میں ایک بڑی پیش رفت ہے۔
ماہرین کا ماننا ہے کہ مستقبل میں یہ ڈرون فوجی نگرانی، سمندری گشت، سرحدی سیکیورٹی اور قدرتی آفات کے دوران امدادی مشنز میں کلیدی کردار ادا کر سکتا ہے۔
