ایک لڑکی جو اپنی دوست کو ایئرپورٹ چھوڑنے نکلی، بدترین ٹریفک میں پھنس گئی جبکہ اس کی دوست با آسانی ہوائی سفر طے کرکے دبئی پہنچ چکی تھی۔
یہ واقعہ بھارت کے شہر بنگلورو میں پیش آیا جہاں ٹریفک جام روزمرہ کا معمول بن چکا ہے۔ اس صورتحال کو اجاگر کرنے والی ایک مختصر سی ویڈیو نے سوشل میڈیا پر دھوم مچا دی ہے۔ محض تین سیکنڈ کی اس ویڈیو کو انسٹاگرام پر 18 ملین سے زائد بار دیکھا جا چکا ہے، اور 10 لاکھ سے زیادہ صارفین نے اسے لائک کیا ہے۔
https://www.instagram.com/reel/DMMuLvMvFFr/?utm_source=ig_embed&utm_campaign=loading
یہ ویڈیو مشہور فوڈ اور ٹریول بلاگرز پریانکا اور اندریانی نے شیئر کی، جس میں کیپشن درج تھا:
“میں نے اپنی دوست کو بنگلورو ایئرپورٹ پر ڈراپ کیا، وہ دبئی پہنچ گئی ہے، اور میں اب تک ٹریفک میں پھنسی ہوں!”
مزاحیہ انداز میں لکھا گیا یہ کیپشن بنگلورو میں ٹریفک کے مسائل کی سنگینی کو اجاگر کرتا ہے۔ انہوں نے کیپشن میں مزید لکھا:
“یہ واقعہ حقیقی ہے۔ جو لوگ بنگلورو میں رہتے ہیں، انہیں ٹیگ کریں!”
ویڈیو پر عوام کی جانب سے دلچسپ تبصرے دیکھنے کو ملے، ایک صارف نے لکھا:
“یہ واقعہ واقعی میرے ساتھ پیش آ چکا ہے۔”
ایک اور صارف نے بنگلور کی حالت کو یوں بیان کیا:
“1 کلومیٹر گاڑی میں = 3 گھنٹے، اور 1 کلومیٹر پیدل = 10 منٹ!”
یہ ویڈیو نہ صرف مزاحیہ ہے بلکہ شہری ٹرانسپورٹ کی ناکامی پر ایک سنجیدہ طنز بھی کرتی ہے۔
