لاہور میں موٹر سائیکل سواروں کے لیے بغیر ہیلمٹ سواری پر مکمل طور پر پابندی عائد کر دی گئی ہے۔ ٹریفک قوانین پر مؤثر عمل درآمد کو یقینی بنانے کے لیے یہ فیصلہ کیا گیا ہے، جو پیر سے نافذ العمل ہوگا۔ چیف ٹریفک آفیسر اطہر وحید کے مطابق، بغیر ہیلمٹ یا نمبر پلیٹ کے موٹر سائیکل چلانے والے افراد کے خلاف سخت کارروائی کی جائے گی، خواہ وہ عام شہری ہوں یا پولیس اہلکار۔
سی ٹی او کا کہنا ہے کہ اگر کوئی پولیس اہلکار بھی اس حکم کی خلاف ورزی کرے گا تو اس کے خلاف مقدمہ درج کیا جائے گا، جبکہ ایسے اہلکار جو قانون پر عمل درآمد کروانے میں ناکام رہیں گے، ان کی سروس ایک سال کے لیے ضبط کر لی جائے گی۔ پولیس لائنز کے تمام اہلکاروں کو اس نئی پابندی سے متعلق پہلے ہی آگاہ کر دیا گیا ہے، اور شہریوں کو عملدرآمد کے لیے دو دن کی مہلت دی گئی ہے۔ اس کے بعد کسی بھی شخص کو بغیر ہیلمٹ موٹر سائیکل چلانے کی اجازت نہیں ہوگی۔
ادھر اسلام آباد میں بھی ٹریفک قوانین کے نفاذ کے لیے جدید طریقے اپنائے جا رہے ہیں۔ وفاقی دارالحکومت میں ڈرون ٹیکنالوجی کی مدد سے ٹریفک کی نگرانی کا عمل شروع کر دیا گیا ہے۔ اسلام آباد ٹریفک پولیس نے ایکسپریس وے اور سری نگر ہائی وے سمیت دیگر مرکزی سڑکوں پر ڈرون کیمروں کے ذریعے ٹریفک قوانین کی خلاف ورزیوں پر نظر رکھنی شروع کی ہے۔
چیف ٹریفک آفیسر کیپٹن (ر) سید ذیشان حیدر کی سربراہی میں اس اقدام کا مقصد ٹریفک قوانین کی حقیقی وقت میں نگرانی اور فوری عملدرآمد کو یقینی بنانا ہے۔ ڈرونز کو لین ڈسپلن، اوورلوڈنگ، ون وہیلنگ اور دیگر خطرناک ڈرائیونگ کی نشاندہی کے لیے استعمال کیا جا رہا ہے۔ حاصل شدہ فوٹیج کی بنیاد پر اب تک 300 سے زائد ڈرائیوروں کو جرمانہ کیا گیا ہے، جبکہ 350 سے زائد شہریوں کو ٹریفک قوانین سے متعلق آگاہی بھی فراہم کی گئی ہے۔ متعدد سنگین خلاف ورزیوں کی حامل گاڑیوں کو مقامی تھانوں میں بند بھی کر دیا گیا ہے۔
