سائنسدانوں نے ایک جدید نظام ایجاد کیا ہے جو اسمارٹ فونز کو زلزلے کی پیشگی اطلاع دینے والا آلہ بنا سکتا ہے۔ یہ نظام وقت پر زلزلے کے خطرے سے خبردار کرنے کے لیے مؤثر ثابت ہو سکتا ہے۔
گوگل اور امریکی جیو لاجیکل سروے
(USGS)
کے محققین کی مشترکہ کوشش سے تیار کیا گیا یہ نظام لاکھوں موبائل فونز سے جمع کیے گئے ڈیٹا کی مدد سے زلزلے کے ابتدائی جھٹکوں کی شناخت کرتا ہے۔
جب کئی ڈیوائسز زمین کی ایک ہی حرکت کو ریکارڈ کرتی ہیں، تو یہ نظام فوری طور پر اس کا پتہ لگا کر قریبی علاقوں میں لوگوں کو الرٹ بھیجتا ہے۔
جرنل سائنس میں شائع تحقیق کے مطابق، اس نیٹ ورک نے ایک ماہ کے دوران 300 سے زائد زلزلے پکڑے۔ جن علاقوں میں انتباہ دیا گیا، وہاں کے 85 فیصد افراد نے بتایا کہ انہیں زلزلے سے پہلے، دوران یا بعد میں الرٹ موصول ہوا تھا۔
تحقیق میں مزید بتایا گیا کہ 36 فیصد افراد کو زلزلے سے پہلے، 28 فیصد کو جھٹکوں کے دوران، اور 23 فیصد کو زلزلے کے بعد خبردار کیا گیا۔
اگرچہ یہ نظام روایتی سیزمک سینسرز کی مکمل جگہ نہیں لے سکتا، تاہم بغیر وسیع سائنسی نیٹ ورک کے بھی یہ کم خرچ اور وسیع پیمانے پر ارلی وارننگ فراہم کر سکتا ہے۔
