دنیا کے بڑے ترین میوزک فیسٹیولز میں شامل ٹومارولینڈ
(Tomorrowland)
کے مرکزی اسٹیج پر فیسٹیول کے آغاز سے صرف دو دن قبل اچانک آگ بھڑک اُٹھی، جس کے نتیجے میں اسٹیج مکمل طور پر تباہ ہو گیا۔
یہ واقعہ بیلجئیم کے شہر بوم میں پیش آیا۔ خوش قسمتی سے اس حادثے میں کوئی جانی نقصان نہیں ہوا۔ امدادی ٹیموں نے فوری طور پر کارروائی کرتے ہوئے شام 8 بجے تک آگ پر قابو پا لیا۔
منتظمین نے اعلان کیا ہے کہ فیسٹیول کا آغاز طے شدہ تاریخ یعنی 18 جولائی 2025 کو ہی ہوگا، جب کہ ڈریم ویلی کیمپنگ ایریا 17 جولائی سے کھول دی جائے گی۔
بی بی سی کے مطابق، اس عالمی فیسٹیول میں تقریباً چار لاکھ افراد شرکت کرنے کی توقع ہے۔
ٹومارولینڈ کی ترجمان ڈیبی ولمسن نے بتایا کہ باقی تمام اسٹیجز محفوظ اور فعال ہیں، اور فیسٹیول کی سرگرمیاں مکمل طور پر جاری رہیں گی۔ تاہم مرکزی اسٹیج کی جگہ متبادل انتظام ممکن نہیں ہو سکا، اس لیے اس سال ایونٹ بغیر مرکزی اسٹیج کے منعقد کیا جائے گا۔
اگرچہ آگ لگنے کی وجوہات واضح نہیں ہو سکیں، مگر سوشل میڈیا پر گردش کرتی کچھ ویڈیوز میں شبہ ظاہر کیا جا رہا ہے کہ فائر ورکس کی جانچ کے دوران کسی تکنیکی خرابی کے باعث یہ واقعہ پیش آیا۔
