پنجاب کے ضلع چکوال میں شدید طوفانی بارش نے تباہی مچا دی، جس کے نتیجے میں دھروگی راجگان ڈیم کا بند ٹوٹ گیا۔ ڈیم کے ٹوٹنے سے چکوال-سوہاوہ روڈ سے فرید خان لنک روڈ کا ایک حصہ سیلابی پانی میں بہہ گیا، جس کے باعث ٹریفک کی روانی شدید متاثر ہوئی اور شہریوں کو شدید مشکلات کا سامنا کرنا پڑا۔
پی ڈی ایم اے کے مطابق، چکوال میں جمعرات کو غیر معمولی بارش کے نتیجے میں “کلاؤڈ برسٹ” جیسی صورتحال پیدا ہوئی، جس کے باعث ندی نالوں میں طغیانی اور فلیش فلڈنگ کا سامنا ہے۔ 10 گھنٹوں کے دوران تقریباً 400 ملی میٹر بارش ریکارڈ کی گئی، جس نے علاقے کو سیلابی کیفیت سے دوچار کر دیا۔
متاثرہ علاقوں میں ریسکیو آپریشن تیزی سے جاری ہے، جہاں ریسکیو 1122، ضلعی انتظامیہ، اور سول ڈیفنس کے اہلکار امدادی سرگرمیوں میں مصروف ہیں۔ ترجمان پی ڈی ایم اے کے مطابق، ڈائریکٹر جنرل پی ڈی ایم اے عرفان علی کاٹھیا ذاتی طور پر ریلیف اور ریسکیو سرگرمیوں کی نگرانی کر رہے ہیں۔
سیلابی پانی میں گھرے ہوئے شہریوں کو نکالنے کے لیے تمام دستیاب وسائل بروئے کار لائے جا رہے ہیں۔ ضلعی انتظامیہ نے ہنگامی صورتحال کے پیش نظر پاک فوج سے بھی مدد طلب کر لی ہے۔ عوام سے اپیل کی گئی ہے کہ وہ غیر ضروری نقل و حرکت سے گریز کریں اور محفوظ مقامات پر رہیں، کیونکہ شدید بارشوں کے پیش نظر خطرات بدستور موجود ہیں۔
