نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 24 گھنٹوں کے دوران ملک کے کئی علاقوں میں موسلا دھار بارشوں کے امکان کا اظہار کیا ہے۔ ترجمان کے مطابق راولپنڈی اور اسلام آباد میں اگلے 24 سے 48 گھنٹوں تک وقفے وقفے سے شدید بارش ہو سکتی ہے، جس کے باعث نالہ لئی میں طغیانی اور نچلے علاقوں میں سیلاب کا خدشہ ہے۔
ترجمان نے خبردار کیا ہے کہ نالہ لئی کے قریب رہنے والے لوگ خطرے کے سائرن پر فوری طور پر محفوظ مقامات کی طرف منتقل ہونے کی تیاری رکھیں۔ لاہور، گوجرانوالہ، چکوال، سرگودھا، فیصل آباد، سیالکوٹ، نارووال، اٹک، حافظ آباد، جہلم، قصور، اوکاڑہ اور دیگر شہروں میں بھی تیز بارش کا امکان ہے۔ متعلقہ اداروں کو ہدایت دی گئی ہے کہ وہ الرٹ رہیں اور شہریوں سے بھی اپیل کی گئی ہے کہ وہ حفاظتی تدابیر پر عمل کریں۔
دوسری جانب، پاک فوج نے شدید بارشوں کے باعث پیدا ہونے والی ہنگامی صورتحال کے پیش نظر پنجاب کے متاثرہ علاقوں میں ریسکیو اور امدادی سرگرمیاں شروع کر دی ہیں۔ آئی ایس پی آر کے مطابق، جہلم کے رسول نگر خورد، برہان نالہ، ڈھوک بھیدر اور داراپور جیسے علاقوں میں ہیلی کاپٹرز کے ذریعے متاثرہ خاندانوں کو محفوظ مقامات پر منتقل کیا گیا ہے۔ ریسکیو ٹیمیں لوگوں کو خوراک، ادویات، لائف جیکٹس اور دیگر ضروری سامان بھی مہیا کر رہی ہیں۔ فوجی اور سول ادارے مشترکہ طور پر صورتحال پر گہری نظر رکھے ہوئے ہیں۔
