پنجاب میں شدید مون سون بارشوں کے نتیجے میں کئی علاقے سیلاب کی لپیٹ میں آگئے، جس پر پاک فوج نے امدادی کارروائیاں شروع کر دیں۔ فوجی دستوں، ہیلی کاپٹرز اور مقامی پولیس کی مشترکہ کوششوں سے درجنوں افراد کو محفوظ مقامات تک پہنچا دیا گیا ہے۔
آئی ایس پی آر کے مطابق ضلع جہلم کے کئی علاقوں — جن میں رسول نگر خورد، برہان نالہ، ڈھوک بھیدر اور داراپور شامل ہیں — شدید طغیانی کا سامنا کر رہے ہیں۔ فوجی اہلکاروں نے ان مقامات سے لوگوں کو نکال کر انہیں لائف جیکٹس، خوراک، طبی امداد اور دیگر ضروری سامان فراہم کیا۔
ریسکیو آپریشن کے دوران ایک نمایاں کامیابی چکری روڈ پر واقع گاؤں لڈیان میں حاصل ہوئی، جہاں ایک خاندان سیلابی پانی میں گھر کر اپنی چھت پر پناہ لینے پر مجبور تھا۔ زمینی راستے مکمل طور پر بند ہونے کے باوجود پاک فوج کے ہیلی کاپٹر نے خراب موسم میں بہادری سے کارروائی کرتے ہوئے تینوں افراد کو بحفاظت نکال لیا۔
ترجمان کے مطابق یہ مشن صرف ایک خاندان کی زندگی بچانے کا عمل نہیں بلکہ اس بات کا ثبوت بھی ہے کہ قدرتی آفات کی صورت میں پاک فوج عوام کے شانہ بشانہ کھڑی ہوتی ہے۔ فوجی دستے مقامی انتظامیہ کے ساتھ مل کر صورت حال کی مسلسل نگرانی کر رہے ہیں اور کسی بھی ممکنہ خطرے سے نمٹنے کے لیے پوری طرح تیار ہیں۔
