پاکستان کے نامور اداکار اور معروف میزبان فیصل قریشی نے شوبز انڈسٹری سے وابستہ فنکاروں کیلئے ایک اہم ویڈیو پیغام جاری کیا ہے۔
https://www.instagram.com/reel/DMGIt5wMIV9/?utm_source=ig_embed&utm_campaign=loading
اپنے پیغام میں فیصل قریشی نے ساتھی اداکاروں کو مخاطب کرتے ہوئے کہا کہ اگر کوئی فنکار کسی مشکل یا پریشانی کا شکار ہے تو خود کو تنہا نہ سمجھے بلکہ ان سے اور ان کی ٹیم سے رابطہ کرے، کیونکہ وہ اور ان کے ساتھی ہر طرح کی مدد کیلئے تیار ہیں۔
انہوں نے بتایا کہ ’ایکٹ پاکستان‘ نامی تنظیم، جو فنکاروں کی فلاح کیلئے کام کر رہی ہے، کی جانب سے حال ہی میں اداکارہ عائشہ خان اور حمیرا اصغر کے ایصالِ ثواب کیلئے قرآن خوانی کا اہتمام کیا گیا تھا۔
فیصل قریشی نے مزید کہا کہ ’ایکٹ‘ کے پلیٹ فارم پر کئی لوگ موجود ہیں جو کسی بھی اداکار کو مالی مشکلات ہوں یا صحت کے مسائل، ہر مرحلے پر بھرپور مدد فراہم کریں گے۔
انہوں نے واضح کیا کہ ان کے ساتھ حنا بیات، عتیقہ اوڈھو، عمیر رانا اور دیگر کئی فنکار بھی دن رات دستیاب ہیں تاکہ ضرورت مند فنکاروں کا ہاتھ تھاما جا سکے۔
سوشل میڈیا پر فیصل قریشی کی اس ویڈیو کو شائقین کی جانب سے خوب پذیرائی مل رہی ہے اور صارفین ان کے اس جذبے کی تعریف کر رہے ہیں۔
