خیبرپختونخواہ کے ریسکیو 1122 کے عملے نے دریائے سندھ میں پھنسے ہوئے لوگوں کو ڈوبنے سے محفوظ بنا لیا۔ اطلاع ملتے ہی ریسکیو ٹیم فوری طور پر جائے وقوعہ پر پہنچی اور ماہر غوطہ خوروں کی مدد سے تمام افراد کو صحیح سلامت نکال لیا گیا۔ اطلاعات کے مطابق دریائے سندھ میں نچلے درجے کا سیلاب آیا ہوا ہے اور ہنڈ کے مقام پر پانی کی سطح اچانک بڑھنے سے تین افراد دریا کے وسط میں پھنس گئے تھے۔
واقعہ پیش آتے ہی ریسکیو 1122 کی ٹیم نے فوری رسپانس دیتے ہوئے بروقت آپریشن کیا، جس کے باعث کوئی جانی نقصان پیش نہیں آیا۔ یاد رہے کہ اس سے قبل بھی خیبرپختونخواہ کے ضلع مانسہرہ میں دریائے کنہار میں سیاحوں کی گاڑی گرنے کا واقعہ پیش آیا تھا، جس میں تین سیاحوں کو بروقت بچا لیا گیا جبکہ ایک سیاح پانی کے بہاؤ میں بہہ گیا تھا۔ پولیس کے مطابق بہہ جانے والا سیاح 16 گھنٹے تک دریا کے بیچ پتھروں میں پھنسا رہا، جسے بعد میں زندہ نکال لیا گیا۔ سیاحوں کا تعلق گوجرانوالہ سے بتایا جاتا ہے۔
