سوشل میڈیا پر شدید تنقید کے بعد اسلام آباد میں نصب ہاتھوں اور گیندوں والا فن پارہ ہٹا دیا گیا۔
تفصیل کے مطابق سی ڈی اے حکام نے بتایا کہ مارگلہ ایونیو کے قریب ایران ایونیو پر ایک نجی ہاؤسنگ سوسائٹی نے انسانی ہاتھوں میں گلوب نما گیند تھامے دو بڑے ماڈل اپنی مدد آپ کے تحت لگا دیے تھے۔ حکام کے مطابق ان ماڈلز کی تنصیب کی نہ تو کسی سرکاری ادارے نے منظوری دی تھی اور نہ ہی یہ سرکاری منصوبے کا حصہ تھے۔
یہ ماڈل نجی ہاؤسنگ سوسائٹی کی جانب سے پبلک پرائیویٹ پارٹنرشپ کے تحت تحفے کے طور پر فراہم کیے گئے تھے۔ مقصد اسلام آباد کی شاہراہوں اور چوراہوں کو خوبصورت بنانا تھا۔ تاہم منظوری کے بغیر لگائے جانے اور ڈیزائن پر عوامی ردِ عمل کے باعث انہیں ہٹانا پڑا۔
واضح رہے کہ مارگلہ ایونیو راؤنڈ اباؤٹ پر نصب یہ آرٹ ماڈل، جس میں دو سنہری ہاتھ اوپر اٹھے دکھائی دیتے تھے اور ان میں سفید رنگ کی گیند رکھی گئی تھی، سوشل میڈیا پر کئی دنوں سے تنقید اور مذاق کا نشانہ بنا رہا تھا۔
ایک صارف رضوان غلزئی نے اس پر تبصرہ کرتے ہوئے سوال کیا تھا کہ ’یہ کس کا وژن ہے؟‘۔ اس بحث کے بعد انتظامیہ نے فیصلہ کیا کہ متنازع ماڈل ہٹا کر علاقے کو دوبارہ پہلے کی حالت میں بحال کر دیا جائے۔
