اب صارفین بغیر انٹرنیٹ، سم یا فون نمبر کے بھی پیغامات بھیجنے اور وصول کرنے کے قابل ہوں گے۔ یہ کارنامہ نئی ایپ بٹ چیٹ نے کر دکھایا ہے جس نے بظاہر ناممکن کو ممکن بنا دیا ہے۔
غیر ملکی میڈیا رپورٹس کے مطابق بہت جلد بٹ چیٹ ایپ عام صارفین کو دستیاب ہوگی۔ اس کے ذریعے لوگ ایسی پیغام رسانی کی سہولت استعمال کر سکیں گے جس کے لیے نہ انٹرنیٹ کی ضرورت ہوگی، نہ سم کی اور نہ ہی کسی فون نمبر کی۔
کبھی یہ صرف ایک تصور تھا کہ بغیر کسی نیٹ ورک کے لوگ ایک دوسرے سے بات چیت کر سکیں گے، لیکن اب یہ خواب حقیقت بننے کے قریب ہے۔ بٹ چیٹ نامی اس نئی ایپ کے فیچرز واقعی حیران کن ہیں اور اسے استعمال کرنے کے طریقے بھی سامنے آ گئے ہیں۔
جدید پیغام رسانی کی اس ایپ نے دیگر میسیجنگ ایپس کو بھی چیلنج دے دیا ہے۔ رپورٹس کے مطابق بٹ چیٹ ایپ روایتی نیٹ ورک کنکشن کے بغیر کام کرے گی۔ یہ ایپ بلیوٹوتھ اور میش نیٹ ورک ٹیکنالوجی کی مدد سے کام کرتی ہے جس کے ذریعے محدود فاصلے میں موجود لوگ آپس میں پیغام رسانی کر سکتے ہیں۔
یہ ایپ صارفین کو انکرپٹڈ اور گمنام رابطے کی سہولت بھی فراہم کرتی ہے، یعنی پیغامات محفوظ رہیں گے اور صارف کی شناخت بھی راز میں رہے گی۔
اگرچہ بٹ چیٹ ایپ کی آفیشل طور پر تصدیق نہیں ہو سکی، لیکن مختلف رپورٹس میں اسے ٹوئٹر کے شریک بانی جیک ڈورسی سے جوڑا جا رہا ہے، تاہم اس تعلق کی بھی کوئی حتمی تصدیق تاحال سامنے نہیں آئی۔
اس ایپ کی آمد پیغام رسانی کے شعبے میں ایک بڑی تبدیلی ثابت ہو سکتی ہے، خاص طور پر ایسے علاقوں یا حالات میں جہاں انٹرنیٹ یا موبائل نیٹ ورک دستیاب نہیں ہوتا۔
