محکمہ موسمیات نے خبردار کیا ہے کہ ملک کے مختلف حصوں میں 15 سے 17 جولائی کے دوران تیز ہواؤں، گرج چمک اور شدید بارشوں کا سلسلہ جاری رہنے کا امکان ہے۔ محکمے کے مطابق اس وقت ہوا کا کم دباؤ بھارتی ریاست مدھیا پردیش کے شمال مغرب میں موجود ہے جو آئندہ 24 سے 72 گھنٹوں میں پاکستان پر اثر انداز ہوگا۔
اس موسمی سلسلے کے باعث مون سون کی ہوائیں ملک کے بالائی اور وسطی علاقوں میں شدت سے داخل ہوں گی، جبکہ مغربی ہواؤں کی لہر بھی شمالی حصوں پر اثرانداز ہوگی۔
محکمہ موسمیات کے مطابق کشمیر کے اضلاع (وادی نیلم، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور) میں 14 جولائی کی رات سے 17 جولائی تک وقفے وقفے سے موسلا دھار بارشیں اور تیز ہوائیں چلنے کی پیشگوئی ہے۔
اسی طرح گلگت بلتستان (دیامیر، استور، غذر، سکردو، ہنزہ، گلگت، گھانچے اور شگر) میں بھی ان دنوں شدید بارشوں کا امکان ہے۔
خیبر پختونخوا کے مختلف اضلاع بشمول دیر، چترال، سوات، کوہستان، مالاکنڈ، شانگلہ، بٹگرام، بونیر، کوہاٹ، کرک، بنوں، ٹانک، لکی مروت، ڈیرہ اسماعیل خان، باجوڑ، مہمند، خیبر، وزیرستان، اورکزئی، مانسہرہ، ایبٹ آباد، ہری پور، پشاور، چارسدہ، نوشہرہ، مردان، صوابی، ہنگو اور کرم میں بھی 14 جولائی کی رات سے 17 جولائی تک بارش اور گرج چمک کی پیشگوئی ہے۔
پنجاب اور اسلام آباد میں بھی راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، لاہور، سیالکوٹ، نارووال، فیصل آباد، سرگودھا، جھنگ، ساہیوال، اوکاڑہ، خانیوال، ملتان، مظفر گڑھ، بہاولپور اور دیگر اضلاع میں شدید بارشیں متوقع ہیں۔
بلوچستان کے شمال مشرقی اور جنوبی علاقے جیسے کوئٹہ، ژوب، قلعہ سیف اللہ، زیارت، شیرانی، لورالائی، سبی، بولان، نصیر آباد اور دیگر علاقوں میں بھی 14 سے 16 جولائی تک گرج چمک کے ساتھ بارش کی پیشگوئی ہے۔
سندھ کے کچھ اضلاع جیسے تھرپارکر، میرپور خاص، سانگھڑ، سکھر، لاڑکانہ، دادو، جیکب آباد، خیرپور اور شہید بینظیر آباد میں بھی تیز ہواؤں اور گرج چمک کے ساتھ بارش کا امکان ہے جبکہ کراچی میں ہلکی بارش متوقع ہے۔
محکمہ موسمیات نے ممکنہ طوفانی بارشوں کے نتیجے میں خیبر پختونخوا، کشمیر، گلگت بلتستان اور مری میں لینڈ سلائیڈنگ جبکہ پنجاب اور دیگر نشیبی علاقوں میں اربن فلڈنگ کے خدشات ظاہر کیے ہیں۔
عوام کو ہدایت کی گئی ہے کہ وہ محتاط رہیں، غیر ضروری سفر سے گریز کریں اور متعلقہ ادارے الرٹ رہ کر حفاظتی اقدامات یقینی بنائیں تاکہ کسی بھی ناخوشگوار صورتحال سے بچا جا سکے۔
