انٹرنیٹ کی مشہور کمپنی گوگل نے اپنی ای میل سروس جی میل میں صارفین کی سہولت کے لیے جدید اے آئی ٹیکنالوجی کا نیا فیچر متعارف کرایا ہے۔
اب جی میل کے ویب ورژن میں صارفین کو لمبی ای میل تھریڈز کے خلاصے خود بخود ایک کلک پر دستیاب ہوں گے۔ اس نئے فیچر کے تحت ای میل میں موجود متعدد پیغامات کی اہم تفصیل گوگل کا اے آئی اسسٹنٹ خود تیار کر کے ای میل کے اوپر واضح انداز میں دکھائے گا، تاکہ صارفین کو ضروری معلومات فوری مل سکیں۔
یہ سہولت گوگل نے سب سے پہلے مئی 2025 میں آئی او ایس اور اینڈرائیڈ صارفین کے لیے متعارف کرائی تھی اور کامیاب تجربے کے بعد اب اسے ویب ورژن میں بھی شامل کر دیا گیا ہے۔
اس خودکار سمری کا خاص پہلو یہ ہے کہ جیسے جیسے نئے پیغامات آتے جائیں گے خلاصہ بھی خودبخود اپ ڈیٹ ہوتا رہے گا اور صارفین کو تازہ معلومات باآسانی ملتی رہیں گی۔
اس کے ساتھ ہی گوگل نے اپنے اے آئی جیمنائی میں بھی سائیڈ پینل فیچر شامل کیا ہے، جس کی مدد سے صارفین کسی بھی ای میل کا خلاصہ فوری طور پر صرف ایک کلک پر حاصل کر سکتے ہیں۔
