ڈی سی اسٹوڈیوز کے نئے دور کی پہلی ریلیز ہونے والی فلم سپر مین نے اپنے آغاز ہی میں شائقین اور ناقدین کو حیران کر دیا ہے، فلم نے عالمی سطح پر ابتدائی دنوں میں ہی 217 ملین ڈالر کا شاندار بزنس کر لیا۔
امریکا میں اس کی اوپننگ 122 ملین ڈالر رہی، جو کہ ڈی سی اور وارنر برادرز کی جانب سے لگائے گئے 90 سے 125 ملین ڈالر کے تخمینے کے بالکل اوپری حصے میں رہی، یوں یہ شاندار کامیابی قرار دی جا رہی ہے۔
یہ نیا سپر مین، پچھلی دہائی میں ریلیز ہونے والی کئی ڈی سی فلموں کی اوپننگ سے بہتر ثابت ہوا۔ اس نے مین آف اسٹیل (2013) کی 116.6 ملین ڈالر کی شروعات کو بھی پیچھے چھوڑ دیا اور ڈی سی کی پچھلی 10 فلموں میں سے 6 کی مکمل کمائی سے زیادہ رقم پہلے ہی کما لی ہے۔
تقریباً 220 سے 225 ملین ڈالر کے بجٹ (جس میں مارکیٹنگ اخراجات شامل نہیں) سے بنائی گئی اس فلم نے ریلیز کے آغاز پر ہی منافع کی راہ ہموار کر دی ہے۔ ماہرین کے مطابق اگر یہ سلسلہ اسی طرح جاری رہا تو یہ فلم ڈی سی یونیورس کے لیے مالی اور تخلیقی دونوں محاذوں پر بڑی کامیابی بن سکتی ہے۔
