پاکستانی شوبز کی مشہور گلوکارہ اور اداکارہ حدیقہ کیانی نے مداحوں سے اپیل کی ہے کہ وہ اداکارہ حمیرا اصغر کی پراسرار موت کو تماشہ نہ بنائیں اور ان کے اہل خانہ کو مزید اذیت نہ دیں۔
انسٹاگرام اسٹوری پر جاری پیغام میں حدیقہ کیانی نے لکھا کہ جب حمیرا اصغر نے اپنی زندگی میں ذاتی معاملات کو عوامی نہ بنانے کا فیصلہ کیا تو اب ان کے انتقال کے بعد ان کے خاندان کو میڈیا کی چکاچوند میں کیوں گھسیٹا جا رہا ہے؟
انہوں نے درخواست کی کہ خدارا حمیرا اصغر کی روح کو سکون میں رہنے دیں، اور ویوز یا ریٹنگز کے لالچ میں ان کی موت کو متنازع بنانے کے بجائے ان کے لیے دعا کریں۔
حدیقہ کیانی نے کہا کہ ایسے لوگوں کو شرم آنی چاہیے جو افسوس کا اظہار تو کر رہے ہیں لیکن ساتھ ہی حمیرا کی ویڈیوز، ریلز اور حتیٰ کہ ان کی میت کی تصاویر شیئر کر کے ان کے نام کا غلط استعمال کر رہے ہیں۔
انہوں نے آخر میں مداحوں اور میڈیا سے اپیل کی کہ حمیرا کی نجی زندگی اور ان کی روح کی حرمت کا خیال رکھا جائے اور ان کے سوگوار خاندان کے صبر اور سکون کے لیے دعا کی جائے۔
