ملک بھر میں موسلا دھار بارشوں کے سبب چار بچوں سمیت بیس افراد جان کی بازی ہار گئے جبکہ بیس سے زائد زخمی ہوئے۔ لاہور سمیت مختلف شہروں میں تیز اور ہلکی بارشوں کا سلسلہ جاری ہے جس کے باعث کئی نچلے علاقے پانی میں ڈوب گئے اور بجلی کی فراہمی متاثر ہونے سے معمولات زندگی مفلوج ہو گئے ہیں۔
لکی مروت کے علاقے دولت خیل میں ایک المناک حادثہ پیش آیا جہاں چار بچے بارش کے پانی میں نہاتے ہوئے ڈوب گئے۔ جاں بحق بچوں کی عمریں 9 سے 12 سال کے درمیان تھیں جن میں دو بھائی بھی شامل ہیں۔ ریسکیو ٹیموں نے فوری کارروائی کر کے بچوں کی لاشیں نکال کر ہسپتال منتقل کیں، جہاں ان کی موت کی تصدیق ہو گئی۔
اوکاڑہ میں آسمانی بجلی گرنے سے ایک لڑکی سمیت دو افراد ہلاک اور ایک شدید زخمی ہوا۔ صحبت پور میں تیز ہواؤں کے ساتھ بارش کے باعث گرڈ اسٹیشن کی مین ٹرانسمیشن لائن ٹاور گرنے سے بجلی بند ہو گئی۔
لاہور کے علاقے بادامی باغ میں مکان کی خراب چھت گرنے سے دو ننھے بچے جان سے گئے جبکہ تین افراد زخمی ہو گئے۔ امدادی ٹیموں نے ملبے سے خاندان کے پانچ افراد کو نکالا۔
خیبرپختونخوا میں بھی طوفانی بارشوں اور آسمانی بجلی گرنے کے واقعات میں آٹھ بچے سمیت دس افراد جاں بحق ہوئے۔ مالاکنڈ، کوہاٹ، باجوڑ اور لکی مروت میں بھی بارشوں کے باعث حادثات پیش آئے۔
ٹانک میں ندی نالوں میں طغیانی سے سیلابی صورتحال پیدا ہو گئی، کئی گھروں اور دکانوں کو نقصان پہنچا جبکہ شاہراہ بند ہو گئی۔
بلوچستان میں بھی مون سون بارشوں کے باعث سولہ افراد ہلاک اور آٹھ زخمی ہوئے، کئی مکانات متاثر ہوئے اور کئی رابطہ سڑکیں بند ہو گئیں۔
پی ڈی ایم اے نے متاثرہ علاقوں میں امدادی کارروائیاں شروع کر دی ہیں اور لوگوں کو خوراک، ٹینٹ اور دیگر ضروری سامان فراہم کیا جا رہا ہے۔ عوام کو احتیاط برتنے اور غیر ضروری سفر سے گریز کی ہدایت کی گئی ہے۔
لاہور میں بھی بارش کا سلسلہ جاری ہے اور مختلف علاقوں میں ریکارڈ بارش ہوئی ہے۔ محکمہ موسمیات کے مطابق بارشیں 17 جولائی تک جاری رہنے کا امکان ہے اور ملک کے مختلف حصوں میں گرج چمک کے ساتھ بارش کا امکان ہے۔
