تجربہ کار اداکار، مصنف اور ڈائریکٹر محمد احمد نے پاکستانی شوبز انڈسٹری کے ایک اہم اور نظر انداز ہونے والے مسئلے پر دو ٹوک مؤقف اپنایا ہے۔
انہوں نے اپنی حالیہ گفتگو میں پروڈکشن ہاؤسز کی غیر ذمے دارانہ پالیسیوں، فنکاروں کی ادائیگیوں میں تاخیر اور ان کی تضحیک پر شدید تحفظات کا اظہار کیا ہے، جس کے بعد سوشل میڈیا پر ایک نئی بحث نے جنم لیا ہے۔
محمد احمد نے کہا کہ پاکستان میں چند گنے چنے اداروں کو چھوڑ کر بیشتر پروڈکشن کمپنیاں فنکاروں کے ساتھ پیشہ ورانہ سلوک نہیں کرتیں۔ ان کے مطابق اداکاروں کو اپنی محنت کی کمائی لینے کے لیے ذلت آمیز طریقے سے منت سماجت کرنی پڑتی ہے، جیسے وہ خیرات مانگ رہے ہوں۔
انہوں نے سوال اٹھایا کہ ایک فنکار کو اپنی جائز مزدوری لینے کے لیے بار بار وضاحت کیوں دینا پڑتی ہے کہ وہ مالی مشکلات کا شکار ہے؟ کیا ایک محنت کرنے والا تخلیق کار اس حد تک مجبور ہو جائے گا کہ اس کی عزت نفس مجروح ہو؟
یہ پہلی مرتبہ نہیں کہ کسی سینئر نے اس حساس مسئلے پر آواز بلند کی ہو۔ اس سے قبل معروف ڈائریکٹر مہرین جبار بھی شوبز میں ادائیگیوں میں تاخیر کے مسئلے کو اجاگر کر چکی ہیں۔ اب محمد احمد کی کھل کر کی گئی بات نے ایک بار پھر اس صنعت میں موجود سنگین خامیوں کو سب کے سامنے رکھ دیا ہے۔
