حمیرا اصغر کی افسوسناک موت کے بعد احمد علی بٹ کو شدید تنقید کا سامنا کرنا پڑ رہا ہے کیونکہ انہوں نے مرحومہ کا پرانا پوڈکاسٹ دوبارہ اپنے پلیٹ فارم پر لگا دیا۔ حمیرا کی اچانک موت کے بعد ان کے انٹرویوز اور ویڈیوز دوبارہ سوشل میڈیا پر وائرل ہوئیں تو احمد علی بٹ نے بھی تقریباً گیارہ ماہ پرانا ریکارڈ کیا گیا پوڈکاسٹ ری اپلوڈ کیا، جو مختصر وقت میں دو لاکھ سے زیادہ بار دیکھا جا چکا ہے۔
تاہم، صارفین نے اس پر ناراضی کا اظہار کرتے ہوئے الزام لگایا کہ احمد علی بٹ نے حمیرا کی موت کو اپنی مقبولیت بڑھانے اور فائدہ کمانے کا ذریعہ بنایا۔ لوگوں نے کمنٹس میں انہیں موقع پرست اور خود غرض قرار دیا۔ ایک صارف نے لکھا کہ سب لوگ حمیرا کے کلپس شیئر کر رہے تھے تو انہوں نے پورا پوڈکاسٹ دوبارہ لگا دیا تاکہ ویوز اور پیسے بڑھ جائیں۔
شدید ردعمل کے بعد احمد علی بٹ نے وضاحت پیش کی کہ انہوں نے پوڈکاسٹ دوبارہ اس لیے شیئر کیا تاکہ لوگ حمیرا کی اصلی زندگی، جدوجہد اور حقیقت کو مکمل طور پر دیکھ سکیں کیونکہ ادھورے کلپس سیاق و سباق بگاڑ رہے ہیں۔ ان کا کہنا تھا کہ کچھ لوگ کلپس کو غلط استعمال کر رہے ہیں اس لیے اصل پوڈکاسٹ دیکھنا زیادہ بہتر ہے۔
