مسرور احمد مسرور
وینکور (کینیڈا) گھومنے کے ساتھ ہر چیز کا باقاعدگی سے مشاہدہ کرنا اور ضروری معلومات حاصل کرنا ایک فطری عمل ہے۔ ان مشاہدات کے حوالے سے حاصل ہونے والی معلومات کو قلم کی زد میں لا کر تحریری شکل دینا لوگوں کی آگاہی کے لیے بہت ضروری ہے۔
پچھلے کئی دنوں میں خوب صورت جھیلوں، جنگلات اور باغات کی سیر و تفریح کے دوران یہ بات مشاہدے میں آئی کہ یہاں اونچے اونچے ہرے بھرے درختوں کی بہتات ہے اور وینکور کا حسین معتدل موسم ان درختوں کا ہی کمال ہے کیوں کہ یہ ایک درخت دوست شہر ہے اور اس دوستی نے شہر کی کایا پلٹ کر رکھ دی ہے۔
ایک صحت مند ماحول کو برقرار رکھنے کے لیے درختوں کا ہونا انتہائی اہمیت کا حامل ہے۔ یہ درخت گرم زمین کے درجہ حرارت کو کم کرکے درجہ حرارت کو معتدل رکھتے ہیں۔ درختوں والی جگہیں انسانوں کو ذہنی اور جسمانی سکون پہنچاتی ہیں اور انھیں فعال رکھتی ہیں۔ درختوں کا تحفظ اور ان میں اضافہ ہمارے ماحول کے لیے بہت ضروری ہے۔ درخت ہوا سے آلودگی اور دھول کو جذب کرکے ہوا کو صاف کرتے ہیں اور اس میں نمی پیدا کرتے ہیں جس سے گرمی کم ہوتی ہے۔ غرض یہ کہ درختوں کا ہماری زندگی کو بہتر بنانے میں بہت زیادہ عمل دخل ہے۔
وینکور کو ہم بلاشبہ (Tree Land) یعنی درختوں کی سرزمین کہہ سکتے ہیں کیوں کہ یہاں بہت زیادہ سبزہ، جنگلات اور درختوں والے علاقے موجود ہیں۔ وینکور میں بڑی تعداد میں پارک موجود ہیں جن میں ہرے بھرے اونچے اونچے درخت پائے جاتے ہیں۔ یہاں درختوں کے تحفظ اور ان کی تعداد میں اضافے پر بہت زیادہ توجہ دی جاتی ہے۔ وینکور کے اسٹینلے Stanley پارک میں تقریباً 5 لاکھ درخت موجود ہیں اور اسے بہت گھنے جنگل پر مبنی پارک کی حیثیت حاصل ہے۔ یہ ایک ہزار ایکڑ پر قائم ہے، یہ دنیا کے جنگلات والے بڑے پارکس میں سے ایک ہے۔ یہاں کئی سو سال پرانے درخت موجود ہیں جن کی اونچائی 76 میٹر تک بتائی جاتی ہے۔ اس پارک میں سیڈر، ۔۔۔۔۔۔۔اور ہیملاگ کے بڑے بڑے درخت ہیں۔ اس پارک کے درختوں کے تحفظ کے اقدامات پر کام جاری ہے جس پر تقریباً 18 ملین ڈالرز خرچ ہوں گے۔ اسٹینلے پارک وینکور کا ایک اہم ہرا بھرا علاقہ ہے جہاں جنگلی حیات رہتی ہے اور لوگ سکون سے وقت گزارتے ہیں۔ اس پارک کی حفاظت اور بحالی کے لیے کوششیں جاری ہیں تاکہ آیندہ نسلوں کے لیے خوب صورت قدرتی ماحول برقرار رہے۔ برٹش کولمبیا یونیورسٹی کے پاس پیسفک اسپرٹ ریجنل پارک ہے، یہاں بھی گھنے جنگلات میں ہزاروں کی تعداد میں درخت موجود ہیں۔ اس کے بعد کوئین ایلزبتھ پارک ہے یہاں بھی جنگل ہونے کے ساتھ خوب صورت پارک ہے جس میں پرانے درختوں کی بڑی تعداد میں موجودگی دیکھی جا سکتی ہے۔ غرض یہ کہ درجنوں دوسرے پارک وینکور کی قدرتی خوبصورتی میں اضافے کا باعث ہیں۔ لاکھوں کی تعداد میں درختوں نے کینیڈا کے اس شہر کو جنت بے نظیر بنا دیا ہے۔
درخت ہماری زندگی کے ساتھی ہیں جن کا تحفظ کرنا ہم سب کا فرض ہے۔
