نئے مالی سال کے دوسرے ہفتے میں مہنگائی کا دباؤ مزید بڑھ گیا — پیاز، آلو، چینی، چکن اور سبزیوں سمیت 19 بنیادی اشیاء کی قیمتیں پھر اوپر چلی گئیں۔
تفصیلات کے مطابق مالی سال 2025-26 کے دوسرے ہفتے میں بھی مہنگائی کی شرح میں اضافہ برقرار رہا۔ تازہ ترین سرکاری رپورٹ کے مطابق گزشتہ ہفتے کے مقابلے میں مہنگائی کی ہفتہ وار شرح 0.95 فیصد بڑھی، جبکہ اس سے پچھلے ہفتے بھی اس میں 0.73 فیصد کا اضافہ ہوا تھا۔ سالانہ بنیاد پر حالیہ ہفتے میں مہنگائی کی شرح میں 1.23 فیصد اضافہ ریکارڈ کیا گیا۔
ادارہ شماریات کی ہفتہ وار رپورٹ کے مطابق ایک ہفتے میں 19 اشیائے ضروریہ مہنگی ہوئیں، 6 کی قیمتوں میں کمی اور 26 اشیاء کی قیمتیں برقرار رہیں۔
اعداد و شمار کے مطابق حالیہ ہفتے میں ٹماٹر کی قیمت میں 13.45 فیصد، چکن کی قیمت میں 22.61 فیصد، پیاز میں 6.25 فیصد، آلو میں 2.79 فیصد، لہسن میں 2.36 فیصد، چینی میں 1.90 فیصد اور گڑ کی قیمت میں 1.89 فیصد اضافہ ریکارڈ ہوا۔
اسی طرح باسمتی ٹوٹا چاول 0.84 فیصد اور ایل پی جی 2.56 فیصد مہنگی ہوئی، جبکہ سرسوں کے تیل، دال مونگ، کوکنگ آئل، وناسپتی گھی اور آٹے کی قیمتوں میں معمولی کمی دیکھی گئی۔
رپورٹ میں بتایا گیا ہے کہ 17 ہزار 732 روپے ماہانہ آمدنی والے طبقے کیلئے مہنگائی کی رفتار 1.06 فیصد اضافے سے منفی 1.83 فیصد رہی، 17 ہزار 733 سے 22 ہزار 888 روپے آمدنی والے طبقے کیلئے مہنگائی کی رفتار 1.10 فیصد اضافے کے ساتھ منفی 2.79 فیصد رہی۔
اسی طرح 22 ہزار 889 روپے سے 29 ہزار 517 روپے آمدنی والے طبقے کیلئے مہنگائی کی شرح 0.99 فیصد اضافے کے ساتھ منفی 1.41 فیصد، 29 ہزار 518 سے 44 ہزار 175 روپے آمدنی والے طبقے کیلئے 1.02 فیصد اضافے کے ساتھ منفی 0.59 فیصد رہی۔
44 ہزار 176 روپے ماہانہ سے زیادہ آمدنی رکھنے والے طبقے کیلئے مہنگائی کی رفتار 0.88 فیصد بڑھ کر منفی 0.04 فیصد ریکارڈ کی گئی۔
