ویڈیوز کے لیے سب سے زیادہ استعمال ہونے والے پلیٹ فارم یوٹیوب نے اپنے ایک دہائی پرانے فیچر کو ختم کرنے اور اس کی جگہ نیا آپشن متعارف کرانے کا فیصلہ کیا ہے۔
دی ورج کی رپورٹ کے مطابق یوٹیوب اپنے ’ٹرینڈنگ‘ سیکشن کو ختم کرنے جا رہا ہے جو صارفین کو دنیا بھر کی مقبول ویڈیوز ڈھونڈنے میں مدد دیتا تھا۔
یوٹیوب کا کہنا ہے کہ اگلے دو ہفتوں میں ٹرینڈنگ پیج اور ٹرینڈنگ ناؤ کو پلیٹ فارم سے ہٹا دیا جائے گا اور اس کی جگہ اب یوٹیوب چارٹس کے نام سے نیا فیچر پیش کیا جائے گا جو اعلیٰ کارکردگی دکھانے والے مواد کی درجہ بندی کرے گا۔
یوٹیوب چارٹس صارفین کو مخصوص شعبوں میں سب سے زیادہ دیکھی جانے والی ویڈیوز تلاش کرنے میں مدد دے گا، جس میں اس وقت موسیقی کی ویڈیوز، پوڈکاسٹ اور فلموں کے ٹریلر شامل ہیں۔
پلیٹ فارم کا کہنا ہے کہ وقت کے ساتھ ساتھ چارٹس میں مزید کیٹیگریاں بھی شامل کی جائیں گی جبکہ گیمنگ سے متعلقہ ویڈیوز گیمنگ ایکسپلور پیج کے نیچے دیکھی جا سکیں گی۔
کمپنی نے ایک بلاگ میں کہا ہے کہ جب دو ہزار پندرہ میں یہ فیچر پہلی بار شروع کیا گیا تھا تو اس کا مقصد وائرل ویڈیوز کی ایک فہرست فراہم کرنا تھا جس سے صارفین کو تازہ ترین رجحانات جاننا آسان ہوتا۔
کمپنی کے مطابق اب حالات بدل چکے ہیں، آج بہت ساری ویڈیوز مختلف مداحوں اور کمیونٹیز کے ذریعے تیار کی جا رہی ہیں جن میں نئے چھوٹے رجحانات بھی شامل ہیں جو پہلے کی نسبت زیادہ متنوع ہیں۔
