عالمی مارکیٹ میں سونے کی قیمتوں میں اُتار چڑھاؤ کا سلسلہ بدستور جاری ہے اور حالیہ اضافے کے بعد پاکستان میں بھی سونا مزید مہنگا ہوگیا ہے۔ میڈیا رپورٹس کے مطابق بین الاقوامی سطح پر سونے کی قدر میں اضافہ ہونے کی وجہ سے مقامی سطح پر بھی اس کی قیمت نئی بلندیوں کو چھو رہی ہے۔ قیمتوں میں حالیہ نمایاں اضافے کے بعد فی تولہ سونا ملکی تاریخ کی بلند ترین سطح پر پہنچ گیا ہے۔
ملک بھر کی صرافہ مارکیٹوں میں آج فی تولہ سونا 3 ہزار 200 روپے مہنگا ہوا، جس کے بعد نئی قیمت بڑھ کر 3 لاکھ 54 ہزار 700 روپے تک پہنچ گئی ہے۔ اسی طرح دس گرام سونے کی قیمت میں بھی 2 ہزار 744 روپے کا اضافہ ریکارڈ کیا گیا، جس کے بعد اس کی نئی قیمت 3 لاکھ 4 ہزار 700 روپے ہوگئی ہے۔
بین الاقوامی مارکیٹ میں فی اونس سونا 22 ڈالر مہنگا ہو کر 3 ہزار 324 ڈالر فی اونس تک جا پہنچا ہے۔
دوسری جانب ملکی زرمبادلہ کے ذخائر میں بھی خاطر خواہ اضافہ دیکھا گیا ہے۔ اسٹیٹ بینک کی جانب سے جاری کردہ تازہ ترین اعدادوشمار کے مطابق 4 جولائی کو ختم ہونے والے ہفتے کے دوران زرمبادلہ کے ذخائر میں 1 ارب 774 ملین ڈالر کا اضافہ ریکارڈ کیا گیا جس کے بعد مجموعی ذخائر 20.02 ارب ڈالر کی سطح پر پہنچ گئے ہیں۔
اس دوران مرکزی بینک کے پاس موجود زرمبادلہ کے ذخائر بڑھ کر 14.50 ارب ڈالر تک پہنچ گئے ہیں جبکہ کمرشل بینکوں کے پاس 5.52 ارب ڈالر موجود ہیں۔ زرمبادلہ کے ذخائر میں یہ اضافہ سرکاری مالی آمدنی کی وصولی کی بدولت ممکن ہوا ہے۔
