کراچی میں انتقال کرنے والی اداکارہ حمیرا اصغر کی وفات نے شوبز انڈسٹری اور ان کے مداحوں کو گہرے صدمے میں مبتلا کر دیا ہے۔ حمیرا کے اہل خانہ کی جانب سے لاش وصول کرنے سے انکار کے بعد، کئی شوبز شخصیات نے ان کی تدفین کا بوجھ اٹھانے کی پیشکش کی ہے۔
سب سے پہلے سماجی کارکن مہر بانو سیٹھی نے اس نیک کام کا اعلان کیا، جس کے بعد معروف اداکارہ سونیا حسین نے بھی اس ذمہ داری کو قبول کرنے کا اعلان کیا۔
سونیا حسین نے ایک جذباتی ویڈیو پیغام میں کہا کہ انہیں معلوم ہوا کہ حمیرا کا انتقال ہو چکا ہے اور ان کے اہل خانہ نے لاش وصول کرنے سے انکار کر دیا ہے۔ وہ اس خبر سے بہت افسردہ ہوئی ہیں اور سوال کیا کہ اس لڑکی نے کیا گناہ کیا تھا؟ انہوں نے کہا کہ وہ کسی کو نصیحت نہیں کر رہی، لیکن اگر کوئی نہیں آیا تو بطور انسان اور مسلمان وہ حمیرا کی کفن دفن کی ذمہ داری خود سنبھالنا چاہتی ہیں۔
https://www.instagram.com/p/DL5KsTaSunm/
ویڈیو کے دوران سونیا حسین جذباتی ہو گئیں اور لوگوں سے اپیل کی کہ اپنے گھر والوں، پڑوسیوں اور دوستوں سے رابطہ رکھیں۔
اداکار یاسر حسین نے سونیا کی ویڈیو کو سراہتے ہوئے کہا کہ یہ ذمہ داری سونیا کو ہی دینی چاہیے، ورنہ وہ خود بھی اس میں شامل ہونے کو تیار ہیں۔ انہوں نے کہا کہ جس انڈسٹری کی وجہ سے مرحومہ کے اہل خانہ نے اس سے دوری اختیار کی، وہی انڈسٹری ان کی مدد کے لیے حاضر ہے۔
شوبز کی دیگر شخصیات اور مداحوں نے سونیا اور یاسر کے اس انسانی اقدام کی بہت تعریف کی۔
سمیع خان نے کہا، “مور پاور ٹویو”، غنا علی نے لکھا، “میری پیاری سونیا، خدا تمہارا بھلا کرے”، جبکہ علی کاظمی نے کہا، “یہ سب سے خوبصورت اور بنیادی انسانیت کا مظہر ہے، تم پر فخر ہے۔”
