پاکستانی فلم اور ڈرامہ انڈسٹری کی معروف اداکارہ زارا نور عباس نے حال ہی میں غیر حقیقی حسن کے پیمانوں اور اینٹی ایجنگ پراڈکٹس کے استعمال کے خلاف اپنی آواز بلند کی ہے۔
زارا نور عباس نے میڈیا اور اپنے چاہنے والوں کو پیغام دیا ہے کہ عمر چھپانے یا خود کو زبردستی جوان دکھانے کی دوڑ چھوڑ دیں اور بڑھتی عمر کو فطری انداز میں اپنائیں، کیونکہ بڑھاپا کوئی عیب نہیں بلکہ زندگی کا خوبصورت حصہ ہے۔
انہوں نے اپنی پوسٹ میں لکھا کہ اینٹی ایجنگ پراڈکٹس کو بڑھاوا دینا بند کریں، عمر کا بڑھنا ایک قدرتی عمل ہے جسے روکنے کی کوشش فضول ہے۔ اس کے بجائے وزن کم کرنے والی دواؤں، سلمنگ ڈراپس یا رنگ گورا کرنے والی ادویات کے جھانسے میں نہ آئیں۔ انہوں نے کہا کہ وقتی خوبصورتی کی نسبت اصل خوبصورتی انسان کی سوچ اور ذہن ہے جو ہمیشہ آپ کے ساتھ رہتا ہے۔
زارا نور عباس کا یہ پیغام ایسے وقت پر سامنے آیا ہے جب بالی ووڈ اداکارہ شیفالی زری والا کی اینٹی ایجنگ انجیکشنز کے استعمال کے باعث مبینہ طور پر ہارٹ اٹیک سے موت واقع ہوئی۔ پوسٹ مارٹم رپورٹ کے مطابق شیفالی گزشتہ 8 برس سے اینٹی ایجنگ انجیکشنز لے رہی تھیں جو ان کی اچانک موت کی وجہ بنے۔
