عالمی مارکیٹ میں سونے کی قیمتوں میں اتار چڑھاؤ جاری ہے۔ گزشتہ دنوں عالمی منڈی میں نرخ بڑھنے سے پاکستان میں بھی سونے کی قیمتوں میں اضافہ دیکھنے میں آیا تھا، تاہم اب بین الاقوامی سطح پر سونے کی قیمت میں کمی کے اثرات مقامی مارکیٹ پر بھی پڑے ہیں۔
میڈیا رپورٹس کے مطابق آج ملک بھر کی صرافہ مارکیٹوں میں فی تولہ سونے کی قیمت میں 2,500 روپے کی نمایاں کمی ریکارڈ کی گئی ہے، جس کے بعد سونے کا نیا ریٹ فی تولہ 3 لاکھ 53 ہزار روپے پر آ گیا ہے۔ اسی طرح 10 گرام سونے کی قیمت میں 2,143 روپے کی کمی ہوئی ہے، جس کے بعد 10 گرام سونا 3 لاکھ 2 ہزار 640 روپے میں دستیاب ہے۔
عالمی مارکیٹ میں سونے کی قیمت 25 ڈالر گھٹ کر فی اونس 3,310 ڈالر ہو گئی ہے۔
دوسری طرف انٹربینک میں ڈالر کے مقابلے میں پاکستانی روپے کی قدر میں معمولی کمی دیکھی گئی ہے۔ اسٹیٹ بینک کے مطابق پیر کے روز انٹربینک میں ڈالر کی قدر 25 پیسے بڑھ گئی جس کے بعد ڈالر کا ریٹ 284 روپے 21 پیسے پر پہنچ گیا۔
دیگر غیر ملکی کرنسیوں میں سعودی ریال 75 روپے 78 پیسے، بحرینی دینار 753 روپے 94 پیسے، عمانی ریال 738 روپے 23 پیسے، کویتی دینار 930 روپے 95 پیسے اور قطری ریال 77 روپے 97 پیسے پر ٹریڈ ہوا۔
اوپن مارکیٹ میں امریکی ڈالر کی خریداری قیمت 285 روپے 50 پیسے جبکہ فروخت 286 روپے 65 پیسے رہی۔
گورنر اسٹیٹ بینک جمیل احمد کا کہنا ہے کہ اب ماضی کی غلطیوں کو دہرانے کا وقت نہیں، ملک کو معاشی طور پر مضبوط بنانے کے لیے اس موقع کو بہتر طریقے سے استعمال کرنا ہوگا۔
