چین میں ہونے والے شنگھائی کوآپریشن آرگنائزیشن (ایس سی او) فلم فیسٹیول میں پاکستان کی معروف فلموں نے نمایاں کامیابیاں سمیٹ لیں۔
پانچ روز تک چین کے شہر یانگ ژو میں جاری رہنے والے اس فلمی میلے میں پاکستان کی بلاک بسٹر فلم ’’دیمک‘‘ نے بہترین ایڈیٹنگ ایوارڈ اپنے نام کیا جبکہ فلم ’’نایاب‘‘ کو اسپیشل جیوری ایوارڈ سے نوازا گیا۔
فلم ’’دیمک‘‘ کے ڈائریکٹر رافع راشدی اور اداکارہ سونیا حسین نے بہترین ایڈیٹنگ ایوارڈ وصول کیا۔ فلم ’’نایاب‘‘ کے ہدایتکار عمیر ناصر علی اور اداکار اسامہ خان کو خصوصی جیوری ایوارڈ سے نوازا گیا۔
’’دیمک‘‘ کی اسٹار کاسٹ میں جاوید شیخ، ثمینہ پیرزادہ، بشریٰ انصاری، فیصل قریشی، سونیا حسین اور ثمن انصاری سمیت کئی نامور فنکار شامل ہیں۔ اس فلم کی کہانی ساس اور بہو کے درمیان تلخ تعلقات کے گرد گھومتی ہے۔
دوسری طرف فلم ’’نایاب‘‘ میں یمنیٰ زیدی، جاوید شیخ، عدنان صدیقی، فواد خان، اسامہ خان اور فریال محمود نے اداکاری کے جوہر دکھائے ہیں۔ فلم کی کہانی ایک ایسی لڑکی کی جدوجہد پر مبنی ہے جو بچپن سے کرکٹ کھیلنے کا خواب لیے سماجی اور خاندانی رکاوٹوں کا مقابلہ کرتی ہے۔
