ننگرپارکر کے علاقے میں اچانک موسلادھار بارش کے بعد آنے والے تیز پانی کے ریلے نے سیاحوں کو اپنی لپیٹ میں لے لیا۔ اس افسوسناک واقعے میں ایک سیاح ڈوب کر جان کی بازی ہار گیا جبکہ باقی 11 افراد کو بحفاظت نکال لیا گیا۔
تھرپارکر کے پہاڑی علاقے ننگرپارکر میں واقع مایا ڈیم کے قریب 12 افراد سیاحت کے بعد واپس آ رہے تھے کہ اچانک تیز پانی میں پھنس گئے۔ اطلاع ملتے ہی پولیس اور مقامی لوگوں نے مشترکہ ریسکیو آپریشن شروع کیا اور ایک گھنٹے کی کوششوں کے بعد 11 سیاحوں کو زندہ نکال لیا۔
ریسکیو حکام کے مطابق جاں بحق ہونے والا سیاح طلحہ کراچی کے علاقے گارڈن کا رہائشی تھا، جس کی لاش مسلسل کوششوں کے بعد پانی سے نکال لی گئی۔ محفوظ نکالے گئے افراد میں 4 کراچی اور 7 مٹھی سے تعلق رکھتے ہیں، جو کارونجھر کی پہاڑیوں اور مایا ڈیم کا آبشار دیکھنے آئے تھے۔
علاقے میں گزشتہ دن سے وقفے وقفے سے ہلکی اور تیز بارش کا سلسلہ جاری ہے۔ ضلعی انتظامیہ اور پولیس نے شہریوں سے کہا ہے کہ وہ بارش کے دوران قدرتی اور پہاڑی مقامات پر احتیاط برتیں اور غیر ضروری سیاحت سے گریز کریں تاکہ کسی حادثے سے بچا جا سکے۔ مقامی افراد کی مدد سے ریسکیو کارروائی مکمل کی گئی جبکہ انتظامیہ کی جانب سے شہریوں کیلئے حفاظتی ہدایات بھی جاری کی گئی ہیں۔
Ask ChatGPT
