لاڑکانہ(بیورورپورٹ) لاڑکانہ میں ہر سال کی طرح اس سال بھی کربلا کے شہداء کی یاد میں پوج ہندو پنچایت لاڑکانہ کی جانب سے ہندو دھرم شالا میں نیازِ امام حسینؑ کا اہتمام کیا گیا، جس میں پاکستان پیپلز پارٹی سندھ کے صدر اور پبلک اکاؤنٹس کمیٹی کے چیئرمین نثار احمد کھوڑو، چیئرمین پاکستان پیپلز پارٹی بلاول بھٹو زرداری کے پولیٹیکل سیکریٹری جمیل احمد سومرو، وزیراعلیٰ سندھ کے معاونِ خصوصی خیرمحمد شیخ، ڈی آئی جی لاڑکانہ ناصر آفتاب، ڈپٹی کمشنر لاڑکانہ ڈاکٹر شرجیل نور چنا، دڑی ٹاؤن کے
چیئرمین شاہ رخ انور سیال، ق لیگ کے رہنما بابو سرور سیال، سابق ڈی آئی جی نارکوٹکس ریاض سومرو، لاڑکانہ پریس کلب کے صدر نوید لاڑک، نائب صدر غلام مرتضیٰ کلہوڑو، جنرل سیکریٹری عبدالقادر جاگیرانی، جوائنٹ سیکریٹری سلامت ابڑو، خزانچی منصور عباس ابڑو، محمد عاشق پٹھان، ہندو پنچایت کے چیئرمین ہریش لال، ایڈووکیٹ کلپنا دیوی، ڈاکٹر امبرت لال سمیت ڈاکٹروں، پروفیسروں، اساتذہ، سیاسی و سماجی تنظیموں، سول سوسائٹی کے رہنماؤں اور مختلف مکاتبِ فکر کے افراد نے بڑی تعداد میں شرکت کی،
اس موقع پر میڈیا سے بات کرتے ہوئے ایڈووکیٹ کلپنا دیوی نے کہا کہ ہندو پنچایت کی جانب سے ہر سال کی طرح اس سال بھی شہدائے کربلا کو خراجِ عقیدت پیش کرنے کے لیے ہندو دھرم شالا میں نیاز و لنگر کا اہتمام کیا گیا ہے،
جس میں مختلف مکاتب فکر کے افراد نے بڑی تعداد میں شرکت کی ہے، انہوں نے کہا کہ شہدائے کربلا کو خراجِ عقیدت پیش کرنے کے لیے لنگر و نیاز کا اہتمام کرنا کسی ایک مذہب تک محدود نہیں
بلکہ انسانیت کی علامت ہے، انہوں نے کہا کہ حضرت امام حسین علیہ السلام اور اُن کے باوفا ساتھیوں کی عظیم قربانی اور جدوجہد انسانیت کے لیے تھی، ہم اس عظیم جذبے کو سلام پیش کرتے ہیں اور آئندہ بھی اس روایت کو جاری رکھا جائے گا۔
