مائیکروسافٹ نے پاکستان میں اپنا مقامی دفتر بند کرنے اور پانچ ملازمین کو فارغ کرنے کا فیصلہ کیا ہے۔
نجی ٹی وی کی رپورٹ کے مطابق اس سے قبل سوشل میڈیا پر خبریں گردش کر رہی تھیں کہ عالمی ٹیکنالوجی کمپنی نے ملک میں اپنی سرگرمیاں مکمل طور پر ختم کر دی ہیں۔
یہ دعویٰ لنکڈاِن پر جاوید رحمن (جو کہ مائیکروسافٹ پاکستان کے سابق سربراہ رہ چکے ہیں) کی ایک پوسٹ کی بنیاد پر سامنے آیا، جس میں انہوں نے ذرائع کا حوالہ دیتے ہوئے کہا کہ مائیکروسافٹ پاکستان میں اپنے آپریشنز باقاعدہ طور پر بند کر رہا ہے۔
اس صورتحال سے باخبر افراد کا کہنا ہے کہ مائیکروسافٹ کی پاکستان میں فزیکل موجودگی حالیہ دنوں تک برقرار تھی، تاہم یہاں عملے کی تعداد پہلے ہی بہت کم تھی جبکہ کمپنی کی بیشتر سرگرمیاں غیر ملکی دفاتر اور مقامی پارٹنرز کے ذریعے چلائی جا رہی تھیں۔
میڈیا کی جانب سے رابطہ کرنے پر مائیکروسافٹ کے ترجمان نے وضاحت دی کہ کمپنی اپنے صارفین کو مضبوط اور وسیع پارٹنر نیٹ ورک اور قریب ترین دفاتر کے ذریعے خدمات فراہم کرتی رہے گی، اور اسی ماڈل کو دنیا کے کئی ممالک میں کامیابی سے اپنایا جا چکا ہے۔
ترجمان نے مزید کہا کہ پاکستان میں بھی مقامی پارٹنرز اور ریجنل دفاتر کے ذریعے آپریشنز جاری رہیں گے۔
Ask ChatGPT
