اسٹریمنگ پلیٹ فارم نیٹ فلکس کی سپرہٹ کورین سیریز ’اسکوئڈ گیم‘ کے تیسرے اور آخری سیزن نے ریلیز ہوتے ہی نیا ریکارڈ قائم کر دیا۔
غیر ملکی رپورٹس کے مطابق ’اسکوئڈ گیم‘ کا تیسرا سیزن 27 جون کو جاری کیا گیا اور ریلیز کے پہلے 72 گھنٹوں میں ہی عالمی سطح پر مقبولیت کے نئے سنگِ میل عبور کر لیے۔ محض تین دن میں اس سیزن کو 6 کروڑ 10 لاکھ بار دیکھا جا چکا ہے، جو نیٹ فلکس کی تاریخ کی سب سے بڑی اوپننگ مانی جا رہی ہے۔
یہ سیزن 93 ممالک میں ٹاپ پوزیشن پر رہا اور غیر انگریزی زبان میں بننے والی سب سے زیادہ دیکھی جانے والی 9ویں سیریز بن گئی ہے۔
تازہ سیزن میں پچھلے حصوں کے مقابلے میں کھیل مزید مشکل اور مناظر زیادہ پرتشدد دکھائے گئے ہیں۔ اس پر شائقین کی جانب سے ملے جلے ردعمل سامنے آئے ہیں۔ کچھ نے ان مناظر کو حقیقت سے قریب تر کہا جبکہ بعض نے اس میں غیر ضروری تشدد کی نشاندہی کی۔
