اداکار ثاقب ثمیر نے حالیہ ایک ٹی وی شو میں اپنی ایک خوفناک کہانی سنائی۔ انہوں نے بتایا کہ وہ ایک ایسی لڑکی کی مدد کر چکے ہیں جس پر جنات کا اثر تھا۔ ثاقب نے کہا کہ یہ ان کی زندگی کا سب سے دہشتناک لمحہ تھا جسے وہ کبھی فراموش نہیں کر سکتے۔
انہوں نے بتایا کہ وہ ایک کرائے کے مکان میں رہتے تھے جہاں پاس ہی ایک اور گھر میں دو لڑکیاں مقیم تھیں۔ چھت پر ملاقات کے دوران ان کی دوستی ہوگئی اور وقت گزارنے لگے۔
ایک دن بات چیت کے دوران لڑکیوں نے بتایا کہ ان میں سے ایک پر جنات کا سایہ ہے، جو اسے بہت پریشان کرتا ہے کیونکہ وہ اکثر جنات کی موجودگی محسوس کرتی ہے اور چونکہ وہ اکیلی رہتی ہے، اس لیے اس کی زندگی مشکل ہو گئی ہے۔
ثاقب نے ان کی مدد کرنے کا فیصلہ کیا اور کہا کہ جب بھی ایسا ہو، وہ بلا سکتی ہیں۔ ایک دن جب اس لڑکی پر جنات کا اثر بڑھ گیا اور اسے دورے پڑنے لگے، تو اس نے ثاقب کو مدد کے لیے بلایا۔ تاہم ثاقب نے براہ راست لڑکی کے گھر جانا مناسب نہیں سمجھا بلکہ اسے اپنے گھر بلایا۔
جب لڑکی پر جنات نے اثر دکھایا تو اس کے بال اس کے چہرے پر بکھر گئے اور وہ غیر معمولی آوازیں نکالنے لگی۔ ثاقب نے اس خوفناک منظر میں دل ہی دل میں سورۃ الناس پڑھنا شروع کر دی۔ مگر وہ اس وقت حیران رہ گئے جب اس جن نے ان کی طرف دیکھ کر کہا، “پڑھنا بند کرو”۔
ثاقب نے بتایا کہ یہ لمحہ ان کے لیے بہت ڈراؤنا تھا کیونکہ وہ تو خاموشی سے تلاوت کر رہے تھے لیکن جن نے انہیں روک دیا۔ اس واقعے کے باوجود، ثاقب نے لڑکی کی مدد جاری رکھی۔
