کراچی کے ایک نوجوان نے دنیا کی سیاحت کا خواب سچا کیا اور صرف 55 دنوں میں اپنی فیملی کے ساتھ کار کے ذریعے 23 ممالک کا دورہ کیا۔
طحہٰ احمد نے اپنے خاندان کے ہمراہ اس منفرد سفر کا آغاز کیا، جو ان کا دیرینہ خواب تھا۔ انہوں نے پاکستان سے روانہ ہو کر کار کے ذریعے دنیا کے 23 مختلف ممالک کی سیر کی۔
اس دلچسپ اور یادگار سفر میں طحہٰ احمد کے ساتھ ان کی اہلیہ اور چھوٹے بیٹے نے بھی شرکت کی۔ ان کا پہلا پڑاؤ ایران تھا، جہاں سے وہ ترکی، بلغاریہ، البانیہ، بوسنیا، کروشیا، اٹلی، سوئٹزرلینڈ، فرانس اور جرمنی ہوتے ہوئے لندن پہنچے۔
طحہٰ احمد نے بتایا کہ ایران میں قیام کے دوران پاکستان اور بھارت کے درمیان کشیدگی اپنے عروج پر تھی، لیکن انہیں ہر جگہ زبردست مہمان نوازی اور گرمجوشی کا سامنا کرنا پڑا، خاص طور پر پاکستانی ہونے کی وجہ سے۔
یہ سفر طحہٰ احمد کے لیے محض ایک سیاحت نہیں بلکہ پاکستان کا مثبت چہرہ دنیا کے سامنے لانے کا ایک ذریعہ بھی تھا۔
