بھارت نے ایک بار پھر پاکستانی مشہور شخصیات کے سوشل میڈیا اکاؤنٹس پر پابندی عائد کر دی، جو ایک دن پہلے ہی بھارتی صارفین کے لیے دوبارہ فعال ہوئے تھے۔
جمعرات کی صبح سے اداکارہ ہانیہ عامر، ماہرہ خان، کرکٹر شاہد آفریدی، ماورا حسین اور فواد خان سمیت کئی معروف پاکستانی شخصیات کے انسٹاگرام اور ایکس (ٹوئٹر) پروفائلز بھارتی صارفین کے لیے دوبارہ بلاک ہو گئے۔
خیال رہے کہ 22 اپریل کو پہلگام میں ہونے والے حملے کے بعد بھارت نے پاکستان پر الزامات لگاتے ہوئے نہ صرف میڈیا بلکہ پاکستانی فنکاروں اور مشہور چہروں کے سوشل میڈیا اکاؤنٹس پر بھی پابندی لگا دی تھی۔ تاہم دو جولائی کو بدھ کے روز اچانک یہ اکاؤنٹس اور کئی یوٹیوب چینلز بھارت میں دوبارہ دستیاب ہو گئے تھے۔
صبا قمر، ماورا حسین، شاہد آفریدی، فواد خان، احد رضا میر، یمنی زیدی اور دانش تیمور سمیت متعدد فنکاروں کے انسٹاگرام اکاؤنٹس کھلنے پر بھارتی مداح خوش دکھائی دیے۔ ہم ٹی وی، اے آر وائی ڈیجیٹل اور جیو کے یوٹیوب چینلز بھی اسی دوران بھارت میں دوبارہ چلنے لگے تھے۔
کئی صارفین اور میڈیا رپورٹس میں کہا گیا کہ بھارت نے یہ ڈیجیٹل پابندی بغیر کسی باضابطہ اعلان کے وقتی طور پر ختم کر دی ہے۔ تاہم جمعرات کو جب ان مشہور شخصیات کے پروفائلز کو دوبارہ کھولا گیا تو پیغام ملا کہ ’یہ اکاؤنٹ بھارت میں دستیاب نہیں، کیونکہ بھارت کی قانونی درخواست پر اس مواد کو محدود کیا گیا ہے‘۔
دلچسپ بات یہ ہے کہ اس پابندی کی بحالی پر بھارتی حکومت یا وزارت اطلاعات و نشریات نے اب تک کوئی سرکاری وضاحت نہیں دی۔
بھارتی میڈیا میں ذرائع کے حوالے سے کہا جا رہا ہے کہ یہ پابندی تکنیکی بنیادوں پر از خود ہٹ گئی تھی کیونکہ اس کی مدت یکم جولائی تک مقرر تھی، جسے اب دوبارہ لاگو کر دیا گیا ہے۔
واضح رہے کہ رواں سال مئی کے اوائل میں بھارتی حکومت نے تمام او ٹی ٹی پلیٹ فارمز، اسٹریمنگ سروسز اور ڈیجیٹل کمپنیوں کو ہدایت دی تھی کہ پاکستان سے آنے والا ہر طرح کا ویڈیو مواد، گانے، ویب سیریز اور پوڈ کاسٹ وغیرہ فوری طور پر بند کر دیے جائیں۔
حکومت نے اپنی ایڈوائزری میں کہا تھا کہ اس بات کی مکمل یقین دہانی کرائی جائے کہ کوئی مواد بھارت کی خودمختاری، سالمیت یا امن عامہ کے لیے خطرہ نہ بنے۔
