مون سون کی تیز ترین بارشوں کے ممکنہ سلسلے کے لیے تیاریاں مکمل کریں۔ نیشنل ڈیزاسٹر مینجمنٹ اتھارٹی (این ڈی ایم اے) نے مختلف علاقوں کے لیے مون سون بارشوں اور ممکنہ سیلاب کے حوالے سے وارننگ جاری کی ہے۔ خیبرپختونخوا، آزاد کشمیر اور شمال مشرقی پنجاب میں 5 سے 8 جولائی کے درمیان شدید بارشوں کا امکان ہے۔
اس دوران دریائے کابل کے نوشہرہ مقام پر پانی کے بہاؤ میں اضافہ متوقع ہے جبکہ منسلکہ ندی نالوں میں طغیانی کا خدشہ ظاہر کیا گیا ہے۔ این ڈی ایم اے کے مطابق تربیلا ڈیم میں پانی کی سطح بڑھنے کی وجہ سے نچلے علاقوں میں سیلاب کی صورتحال پیدا ہو سکتی ہے۔ گلگت بلتستان اور خیبرپختونخوا کے کچھ علاقوں میں گلیشیئر جھیلوں کے پھٹنے کے باعث سیلاب، لینڈ سلائیڈنگ اور نشیبی علاقے متاثر ہو سکتے ہیں۔ لاہور، سیالکوٹ اور نارووال میں شہری سیلاب کا خدشہ ہے جبکہ ڈی جی خان اور راجن پور کے پہاڑی علاقوں میں پانی کے بہاؤ میں اضافے کی توقع ہے۔
این ڈی ایم اے کا کہنا ہے کہ لاہور، سیالکوٹ، گجرات اور نارووال کے ندی نالوں بشمول ایک، ڈیک، بیئن اور پلکھو میں پانی کے بہاؤ میں اضافے کا امکان ہے۔ عوام کو ہدایت کی گئی ہے کہ بارش اور تیز ہواؤں کے دوران کمزور عمارتوں، کچی دیواروں، بجلی کے کھمبوں اور بل بورڈز سے دور رہیں۔ جاری کردہ الرٹ میں کہا گیا ہے کہ آندھی اور طوفان کے باعث حد نگاہ کم ہو سکتی ہے جو حادثات کا باعث بن سکتی ہے۔ عوام کو خبردار کیا گیا ہے کہ بارشوں کی وجہ سے مقامی ندی نالوں میں پانی کا بہاؤ اچانک بڑھ سکتا ہے، اس لیے احتیاط ضروری ہے۔
Ask ChatGPT
