مظفرگڑھ کے سرکاری اسپتال میں غلط انجکشن لگنے سے جاں بحق ہونے والی بچی کی تحقیقات مکمل کر لی گئی ہیں۔
جاری کردہ انکوائری رپورٹ میں واقعے کی ذمہ داری ڈیوٹی پر موجود ڈاکٹر اور ڈسپنسر پر عائد کی گئی ہے۔ رپورٹ کے مطابق ڈسپنسر نے ڈاکٹر کی ہدایت کے بغیر بچی کو غلط انجکشن دے دیا جس کے باعث اس کی موت واقع ہوئی، جبکہ ڈاکٹر نے اپنی ڈیوٹی کے دوران مجرمانہ غفلت برتی۔
واقعے کے بعد متعلقہ ڈسپنسر کو نوکری سے برطرف کر دیا گیا ہے جبکہ ڈاکٹر کے خلاف پیڈا ایکٹ کے تحت کارروائی شروع کر دی گئی ہے۔ یاد رہے کہ تین دن قبل مظفرگڑھ کے دیہی مرکز صحت میں سات سالہ بچی کو پیٹ درد کی شکایت پر لایا گیا تھا، جہاں غلط انجکشن لگنے کے بعد اس کی حالت مزید بگڑ گئی اور وہ جانبر نہ ہو سکی۔
بچی کے والد کا کہنا ہے کہ ڈاکٹر کی موجودگی کے باوجود ڈسپنسر نے غیر ذمہ داری کا مظاہرہ کیا جس کی وجہ سے ان کی بچی کی جان گئی۔
