عالمی مارکیٹ میں سونے کی قیمتوں میں اتار چڑھاؤ کے باعث پاکستان میں بھی سونا مہنگا ہو گیا

عالمی مارکیٹ میں سونے کی قیمتوں میں اتار چڑھاؤ کے باعث پاکستان میں بھی سونا مہنگا ہو گیا ہے۔
گزشتہ دو دنوں میں فی تولہ سونے کی قیمت میں مجموعی طور پر 7 ہزار 400 روپے کا اضافہ ہوا ہے، جس کے بعد آج مزید 6 ہزار 600 روپے کا تاریخی اضافہ ریکارڈ کیا گیا۔ اس اضافے کے ساتھ سونے کی نئی قیمت 3 لاکھ 56 ہزار 800 روپے فی تولہ پر پہنچ گئی ہے، جو اب تک کی بلند ترین سطح ہے۔

اسی طرح 10 گرام سونے کی قیمت میں بھی 5 ہزار 658 روپے کا اضافہ ہوا ہے، اور نئی قیمت 3 لاکھ 5 ہزار 858 روپے تک جا پہنچی ہے۔ عالمی مارکیٹ میں فی اونس سونے کی قیمت 66 ڈالر بڑھ کر 3 ہزار 348 ڈالر فی اونس ہو گئی ہے۔

دوسری جانب، عالمی مارکیٹ میں خام تیل کی قیمتوں میں منگل کو کمی دیکھنے میں آئی ہے۔ اوپیک پلس کے اگست میں پیداوار بڑھانے کے امکان اور امریکی ٹیرف میں اضافے کے خدشات کے باعث برنٹ خام تیل کی قیمت 30 سینٹ کم ہو کر 66.44 ڈالر فی بیرل اور امریکی ویسٹ ٹیکساس انٹرمیڈیٹ (WTI) کی قیمت 33 سینٹ کم ہو کر 64.78 ڈالر فی بیرل ہو گئی ہے۔

ماہرین کا کہنا ہے کہ اوپیک پلس اگست میں پیداوار میں 411,000 بیرل فی دن کا اضافہ کرنے کا ارادہ رکھتا ہے، جو اس سال پیداوار میں مجموعی طور پر 1.78 ملین بیرل فی دن کے اضافے کے برابر ہوگا، جو عالمی تیل کی طلب کا تقریباً 1.5 فیصد ہے۔