Report Sabih Salik
پاکستانی شوبز انڈسٹری کی معروف شخصیات نے دریائے سوات میں ایک ہی خاندان کے 18 افراد کے سیلابی ریلے میں ڈوب جانے کے دل دہلا دینے والے حادثے پر شدید دکھ اور افسوس کا اظہار کیا ہے۔
اس سانحے نے نہ صرف پورے ملک کو سوگوار کر دیا بلکہ فنکار برادری کو بھی گہرے صدمے میں مبتلا کر دیا ہے۔ اداکارہ صبور علی نے اپنی انسٹاگرام اسٹوری پر اس اندوہناک واقعے پر سوال اٹھایا کہ اگر کرکٹ گراؤنڈ دکھانے ہوں تو ہیلی کاپٹر فوری پہنچ جاتے ہیں، لیکن ان بے بس انسانوں کی جان بچانے کوئی پرواز کیوں نہ آئی؟
اداکارہ ماہرہ خان نے بھی اس واقعے پر گہرے رنج کا اظہار کرتے ہوئے لکھا کہ دل ٹوٹ گیا ہے، ہم کہاں جا رہے ہیں؟ آخر یہ سب کیسے ہوتا ہے اور ہم کیوں کچھ نہیں کرتے؟
زارا نور عباس نے اسے انتہائی افسوسناک قرار دیتے ہوئے کہا کہ آخر ہماری ریاست کب جاگے گی؟ یہ لوگ اپنے ٹیکس ادا کرتے ہیں، سیر کے لیے گئے اور جنازے واپس لائے۔
علی ظفر، ہمایوں سعید، فیصل قریشی اور احسن خان سمیت کئی اداکاروں اور کھلاڑیوں نے بھی سوشل میڈیا پر متاثرہ خاندان کے ساتھ اظہارِ یکجہتی کرتے ہوئے کہا کہ اگر بروقت امداد پہنچتی تو اتنی قیمتی جانوں کو بچایا جا سکتا تھا۔
