آرٹس کونسل آف پاکستان کراچی فائن آرٹ کمیٹی کے زیرِ اہتمام معروف پینٹر مسعود اے خان کے ساتھ ایک شام کا انعقاد
دنیا بھر کے آرٹسٹوں کو ایک دوسرے کے ساتھ جوڑنا چاہتے ہیں، صدر آرٹس کونسل محمد احمد شاہ
مسعود اے خان کا کام بہت اعلیٰ ہے ،ان کی نظر دیوار کے اس پار دیکھنے کا کام کرتی ہے، چیئرمین فائن آرٹ کمیٹی فرخ تنویر شہاب
Bursh Hour میں مسعود اے خان نے لائیو پینٹنگ کے ذریعے تخلیقی فن کے جوہر دکھا کر حاضرین کے دل جیت لیے
کراچی () آرٹس کونسل آف پاکستان کراچی فائن آرٹ کمیٹی کے زیرِ اہتمام معروف پینٹر مسعود اے خان کے ساتھ ایک شام کا انعقاد احمد پرویز آرٹ گیلری ، احمد شاہ بلڈنگ میں کیاگیا جس کو Bursh Hour کا نام دیاگیا تھا اس میں مسعود اے خان نے لائیو پینٹنگ کے ذریعے تخلیقی فن کے جوہر دکھا کر حاضرین کے دل جیت لیے، نشست میں صدر آرٹس کونسل محمد احمدشاہ، ٹی وی ڈائریکٹر سہیل ہاشمی، ڈائریکٹر اکیڈمی ارمان رحیم، بین الاقوامی تعاون کے سربراہ جہانزیب علی شاہ، شاہد رسام کے علاوہ فن مصوری سے تعلق رکھنے والی معروف شخصیات نے شرکت کی جبکہ فائن آرٹ کمیٹی کے چیئرمین فرخ تنویر شہاب اور عمائینہ خان نے تخلیقی میزبانی کے فرائض انجام دیے، اس موقع پر صدر آرٹس کونسل محمد احمد شاہ نے گفتگو کرتے ہوئے کہاکہ ہم دنیا کے آرٹسٹوں کو ایک دوسرے کے ساتھ جوڑنا چاہتے ہیں، اس مرتبہ ورلڈ کلچر فیسٹیول میں 102ممالک کے فنکاروں نے ابھی تک اپنی شرکت کی یقینی دہانی کرادی ہے جبکہ 30 ممالک کے پینٹرز بھی فیسٹیول میں شرکت کریں گے، دنیا میں نئی نئی جنگیں ہورہی ہیں ، آرٹ کے نئے میڈیم رجسٹرڈ ہیں، ہم ورلڈ کلچر فیسٹیول میں فائن آرٹ پر ایسا منفرد کام آپ کے سامنے پیش کریں گے جو ملکی تاریخ میں پہلی بار ہوگا، فیسٹیول میں میوزک، ڈانس، تھیٹر، فائن آرٹ سب شامل ہوگا، انہوں نے کہاکہ ہم آرٹس کونسل کی فائن آرٹ کمیٹی کے تحت سینئر آرٹسٹوں کو ٹربیوٹ دے رہے ہیں ، مسعود اے خان ایک اچھے آرٹسٹ ہیں، ان کا کام قابل تعریف ہے، ہم تمام آرٹسٹوں کو ایک چھت تلے جمع کرنا چاہتے ہیں اور انہیں ہر ممکن تعاون فراہم کرنا ہماری اولین ذمہ داری ہے، آرٹس کونسل کو پیسوں سے کوئی محبت نہیں، نمائش سے آرٹسٹ کی حوصلہ افزائی ہوتی ہے، انہوں نے کہاکہ میں چاہتا ہوں کہ تمام آرٹسٹ اپنے کلیکٹرز کو یہاں لے کر آئیں اور اس جگہ کو پرو آرٹسٹ کی جگہ بنائیں ، ہم نے جب سیلاب زدگان کی مدد کے لیے آرٹسٹوں سے رابطہ کیا تو انہوں نے اپنے فن پارے عطیہ کرکے متاثرین کی مدد میں اپنا حصہ ملایا، ہم ایک ویب سائٹ بنا رہے ہیں جس میں آرٹس المنائی اور آرٹسٹوں کا کام دکھائی دے گا، ایک اچھے آرٹسٹ کے لیے آرٹس کونسل کے دروازے ہمیشہ کھلے ہیں ،کام اچھا ہوگا تو نمائش بھی کریں گے۔ فائن آرٹ کمیٹی کے چیئرمین فرخ تنویر شہاب نے کہاکہ مسعود اے خان کا کام بہت اعلیٰ ہے جس کی پوری دنیا معترف ہے، ان کی نظر دیوار کے اس پار دیکھنے کا کام کرتی ہے۔معروف آرٹسٹ مسعود اے خان نے کہاکہ میں ایک مصور ہوں ، آرٹس کونسل نے آرٹسٹوں کو ٹربیوٹ پیش کرنے کا اچھا سلسلہ شروع کیا ہے ،صدر آرٹس کونسل محمد احمد شاہ آرٹسٹوں کو سپورٹ کرتے ہیں، تخلیق کار کا اصل کام اسٹوڈیو میں ہوتا ہے ، ہم کچھ اسکولوں کی کتابوں سے سیکھتے ہیں لیکن جو قدرت کا کمال ہے وہ الگ بات ہوتا ہے ، انہوں نے کہاکہ ہر آرٹسٹ کے اندر کمال و جمال موجود ہے وہ اگر آرٹسٹ کو معلوم ہو جائے تو وہ اپنی بات کو آسانی سے فن پارے میں سمو دیتا ہے ، فنکار دنیا کو صحیح راستے پر لے جاتے ہیں ، مصور کا کام دنیا کو خوبصورتی اور امن کے طرف لے جانا ہے ، ہم جنگیں دیکھ کر پریشان ہوچکے ہیں ایسے حالات میں بھی مصور ، شاعر ،میوزیشن پیدا ہوئے ۔ انہوں نے کہاکہ میں نے اس کام میں خود کو تراشا ہے، کسی بھی تخلیق کار کا اپنے کام سے مخلص ہونا بہت ضروری ہے۔ٹی وی ڈائریکٹر سہیل ہاشمی نے مسعود اے خان کے لائیو پینٹنگ کے کام کو سراہا اور ان کے تخلیقی کام کی تعریف کی۔ نشست میں فن مصوری سے تعلق رکھنے والی مختلف شخصیات نے بھی اظہارِ خیال کیا۔
