لاڑکانہ(بیورورپورٹ) لاڑکانہ یونین آف جرنلسٹس ڈویژن لاڑکانہ کے انتخابات، سینیر صحافی طارق محمود درانی ایک مرتبہ پھر متفقہ طور پر صدر لاڑکانہ یونین آف جرنلسٹس ڈویژن لاڑکانہ منتخب ہوگئے ہیں، اس سلسلے میں لاڑکانہ یونین آف جرنلسٹس کا اجلاس فیڈرل یونین آف جرنلسٹس کے مرکزی خزانچی لالا اسد پٹھان، ایف ای سی کے رکن نصراللہ وسیر، سکھر یونین آف جرنلسٹس کے جنرل سیکریٹری جاوید جتوئی اور قائم مقام صدر خالد بھانبھن کی زیر صدارت لاڑکانہ پریس کلب میں ہوا
جس میں متفقہ طور پر طارق محمود درانی کو صدر، اعجاز علی چانڈیو کو سینئر نائب صدر، شہزاد پٹھان کو نائب صدر، ایاز ساریو کو جنرل سیکریٹری، اکبر آزاد ہیسبانی کو سینئر جوائنٹ سیکریٹری، علی گرامانی کو جوائنٹ سیکریٹری، شاہ محمد لاشاری کو خزانچی، نادر مائری کو پریس سیکریٹری، مومن کنگو کو آفس سیکریٹری، ورکننگ کمیٹی کے ممبران میں پہلوان جویو، مقبول منگی، رشید ابڑو، عبدالوحید گاہو، اعجاز ساریو، زاہد گل ابڑو اور جی ایم جھتیال کو منتخب کیا گیا جس کے بعد نومنتخب عہدیداران
کو پھولوں کے ہار پہنا کر مبارکباد دی گئی، اس موقع پر پی ایف یو جے کے مرکزی خزانچی لالا اسد پٹھان نے خطاب کرتے ہوئے کہا کہ لاڑکانہ پریس کلب کے صحافیوں نے جمہوری روایات کو برقرار رکھتے ہوئے متفقہ فیصلہ کیا جو قابلِ تعریف ہے، انہوں نے کہا کہ صحافی معاشرے کے باشعور افراد ہوتے ہیں اور ان کی ذمہ داری ہے کہ مظلوموں کی آواز ایوانوں تک پہنچائیں، جس میں لاڑکانہ پریس کلب ہمیشہ پیش پیش رہا ہے، انہوں نے مزید کہا کہ پاکستان میں صحافیوں کی تعداد پچاس ہزار جبکہ دنیا بھر میں پانچ لاکھ سے
زائد ہے، پی ایف یو جے کے پلیٹ فارم سے ہماری جدوجہد جاری ہے، خاص طور پر غیراعلانیہ سنسرشپ کے خلاف، وہ وقت دور نہیں جب پاکستان کے صحافیوں کو مکمل آزادی ملے گی، اس کے لیے ہم سب کو متحد ہوکر جدوجہد کرنی ہوگی، قبل ازیں پی ایف یو جے کی مرکزی خزانچی لالا اسد پٹھان اور سکھر پریس کلب کے صحافیوں نے لاڑکانہ پریس کلب کے نومنتخب عہدیداران جنرل سیکریٹری عبدالقادر جاگیرانی، جوائنٹ سیکریٹری سلامت ابڑو، خزانچی منصور عباس ابڑو، ممبر ورکنگ کمیٹی معشوق اوڈھانو اور نادر ابڑو کو پھولوں کے ہار پہنا کر مبارکباد دی، دوسری جانب یونین آف جرنلسٹس کے رہنماؤں نے پی ایف یو جے کے مرکزی خزانچی لالا اسد پٹھان سمیت دیگر مہمانوں کو سندھ کی پہچان اجرک کے تحائف پیش کر کے ان کا شکریہ ادا کیا۔
