سندھ پیپلز ہاؤسنگ کا سیلاب متاثرین کے لیے منفرد ہاؤسنگ منصوبہ

منیلا: سندھ پیپلز ہاؤسنگ (SPHF) کے بورڈ ممبر اور پاکستان مارٹگیج ری فنانس کمپنی (PMRC) کے منیجنگ ڈائریکٹر و سی ای او مدثر حسین خان نے ایشیائی ترقیاتی بینک (ADB) کے ہیڈکوارٹرز میں منعقدہ واٹر اینڈ اربن ڈویلپمنٹ فورم میں پاکستان کی کامیابیوں کو عالمی سطح پر اجاگر کیا۔

اس موقع پر مدثر حسین خان نے قابلِ برداشت اور موسمیاتی تبدیلیوں کے خلاف مضبوط رہائش کے موضوع پر پینل ڈسکشن میں شرکت کرتے ہوئے بتایا کہ “سندھ پیپلز ہاؤسنگ ” سیلاب سے متاثرہ خاندانوں کے لیے محفوظ، سستی اور پائیدار رہائش کی فراہمی کے منصوبوں پر کام کر رہی ہے۔ انہوں نے SPHF کے پوسٹ فلڈ ہاؤسنگ انیشیٹو کی تفصیلات بتاتے ہوئے کہا کہ اس منصوبے کے تحت ہزاروں بے گھر خاندانوں کو جدید اور موسمیاتی چیلنجز کے مطابق گھر فراہم کیے جائیں گے۔

انہوں نے PMRC کے کردار پر روشنی ڈالتے ہوئے کہا کہ “ہاؤسنگ فنانس کے نظام کو بہتر بنانے اور گھر کی ملکیت کو عام شہریوں کے لیے آسان بنانے کے لیے اقدامات کیے جا رہے ہیں۔” ان کا کہنا تھا کہ “ہماری کوشش ہے کہ غریب اور متوسط طبقے کے لیے گھر خریدنے کے مواقع بڑھیں، تاکہ ہر پاکستانی کو اپنا گھر میسر آ سکے۔”

ADF کے فورم میں دنیا بھر کے ماہرین نے پاکستان کے ان اقدامات کو سراہا اور موسمیاتی تبدیلیوں کے خلاف مضبوط رہائشی منصوبوں کی اہمیت پر زور دیا۔ مدثر حسین خان نے کہا کہ “بین الاقوامی تعاون سے ہم پاکستان میں رہائشی بحران کو حل کر سکتے ہیں، خاص طور پر سیلاب جیسے قدرتی آفات کے بعد بے گھر ہونے والوں کی بحالی ہماری اولین ترجیح ہے۔”