نان فائلرز کو گاڑیاں اور پراپرٹی خریدنے کی سہولت نہیں ہوگی‘
وفاقی وزیر خزانہ محمد اورنگزیب کا کہنا ہے کہ نان فائلرز کو گاڑیاں اور پراپرٹی خریدنے کی سہولت نہیں ہوگی۔
بجٹ تقریر کے دوران وفاقی وزیر خزانہ محمد اورنگزیب نے کہا کہ فائلرز اور نان فائلرز کا فرق ختم کرکے صرف ویلتھ اسٹیٹمنٹ جمع کروانے والا مالیاتی لین دین کا حقدار ہوگا۔
انہوں نے کہا کہ سولر پینل کی امپورٹ پر 18 فیصد سیلز ٹیکس عائد کیا جارہا ہے، فیصلہ ملک میں سولر پینل کی مقامی صنعت کے فروغ کے لیے کیا جارہا ہے۔
یہ پڑھیں: لائیو: مالی سال 2025-26 کا بجٹ پیش
وزیر خزانہ نے کہا کہ اسٹیٹ بینک کم آمدن طبقے کے لیے ہاؤسنگ اسکیم کا اعلان جلد کرے گا، بیرون ملک مقیم پاکستانیوں کو سہولتوں میں وسعت دی جائے گی۔
انہوں نے کہا کہ چھوٹے کسانوں کو بغیر ضمانت کے ایک لاکھ روپے تک قرض دیا جائے گا جو ڈیجیٹل سسٹم کے ذریعے ای والٹ میں ملے گا۔
حیدرآباد سکھر موٹروے منصوبے کے لیے صرف 15ارب مختص کیے گئے، شازیہ مری
پیپلزپارٹی کی رہنما شازیہ مری کا کہنا ہے کہ حیدرآباد سکھر موٹروے منصوبے کے لیے صرف 15 ارب روپے مختص کیے گئے ہیں۔
بجٹ 2025-26 پر پی پی رہنما شازیہ مری نے کہاکہ حیدرآباد سکھر موٹروے یہ 306 کلو میٹر رویہ منصوبہ ہے، منصوبے سے متعلق خدشات وزیراعظم کے سامنے رکھے ہیں اور وزیراعظم کو کئی خطوط لکھے ہیں۔
انہوں نے کہا کہ 15 ارب روپے اس منصوبے کے لیے ناکافی ہیں، یہ منصوبہ اس رقم سے مکمل نہیں ہوگا، لگتا ہے کام بھی شروع نہیں ہوگا۔
یہ پڑھیں: مالی سال 2025-26 کا بجٹ پیش، تنخواہ داروں کیلیے ریلیف کا اعلان
صوبائی وزیر اطلاعات شرجیل میمن نے کہا کہ وفاقی حکومت نے حیدرآباد سکھر موٹروے کے لیے خاطر خواہ رقم مختص نہیں کی، سنھ کے دونوں بڑے منصوبے رل جائیں گے۔
انہوں نے کہا کہ سندھ کی عوام کو وفاقی بجٹ سے امیدیں تھیں، سندھ حکومت حیدرآباد، سکھر موٹروے کے لیے کئی خطوط لکھ چکی ہے۔
شرجیل میمن نے کہا کہ پرامید تھے بجٹ میں حیدرآباد اور سکھر موٹروے بنانے کے لیے بڑی رقم مختص ہوگی۔
کراچی چیمبر آف کامرس نے بجٹ مسترد کردیا
کراچی چیمبر آف کامرس کے صدر جاوید بلوانی نے بجٹ 2025-26 کو مسترد کردیا۔
صدر کراچی چیمبر آف کامرس جاوید بلوانی نے کہا کہ میں اس بجٹ کو مانتا ہی نہیں ہوں جس میں گزشتہ مالی سال کی کارکردگی کی وجوہات بیان نہ کی جائیں۔
انہوں نے کہا کہ لوگوں کا برا حال ہے وہ اپنے گھر کی بجلی منقطع کروا رہے ہیں، بجلی اور ٹرانسپورٹ میں پچاس فیصد تنخواہ صرف ہو جاتی ہے، مہنگائی کم کریں، تنخواہیں بے شک نہ بڑھائیں۔
یہ پڑھیں: مالی سال 2025-26 کا بجٹ پیش، تنخواہ داروں کیلیے ریلیف کا اعلان
کراچی چیمبر کے صدر نے کہا کہ زراعت بالخصوص کپاس کی پیداوار انیس سو نوے کی دہائی سے بھی کم ہو گئی ہے لیکن حکومت بضد ہے کہ ہم نمو کی جانب گامزن ہے۔
جاوید بلوانی نے کہا کہ کراچی کے-فور منصوبے کے لیے محض تین ارب بیس کروڑ روپے مختص کیے گئے، حکومت نے بجٹ میں کراچی کو مکمل نظر انداز کیا ہے۔
انہوں نے کہا کہ حکومت نے ٹیکس نیٹ بڑھانے کے لیے نہ پہلے کوئی کام کیا اور نہ آج کے بجٹ میں بات کی۔
