نوابشاہ: التزام ریلیف سوسائٹی ملائیشیا کے وفد کا پاکستان کا دورہ سیلاب متاثرہ علاقوں میں تعمیراتی منصوبوں کا جائزہ
نواب شاہ: التزام ریلیف سوسائٹی ملائیشیا کے چیف ایگزیکٹو آفیسر محمد شاہ، شاھرُل اور نوریتا حسن پر مشتمل وفد نے پاکستان کا تفصیلی دورہ کیا۔ اس دوران پولیس کی سخت سیکیورٹی میں وفد نے سکرنڈ کے قریب سلیمان لِکھی اور گپچانی کے قریب آدم گپچانی گاؤں کا دورہ کیا۔ وفد نے اپنے دورے کے دوران سیلاب متاثرہ خاندانوں کے لیے التزام ریلیف سوسائٹی اور این ڈی ایف کے تعاون سے تعمیر کیے گئے گھروں کا معائنہ کیا اور ان کے معیار کا تفصیلی جائزہ لیا۔ انہوں نے نہ صرف تعمیراتی کام کا
معائنہ کیا بلکہ مقامی دیہاتیوں سے ملاقاتیں بھی کیں تاکہ ان کے موجودہ حالات اور بنیادی ضروریات کے بارے میں معلومات حاصل کی جا سکیں۔اس موقع پر این ڈی ایف پاکستان کے پروگرام مینیجر طارق حسین چنڑ نے وفد کو تفصیلی بریفنگ دی، جس میں انہیں تعمیراتی منصوبوں، موجودہ صورتحال اور آئندہ مراحل کے بارے میں آگاہ کیا گیا۔میڈیا سے گفتگو کرتے ہوئے التزام ریلیف سوسائٹی ملائیشیا کے سِی اِی او محمد شاہ اور شاھرُل نے کہا کہ ہمارا مقصد صرف امداد فراہم کرنا نہیں بلکہ لوگوں کے معیارِ زندگی کو بہتر بنانا ہے۔ تعمیر شدہ گھروں کا معیار اطمینان بخش ہے، لیکن صاف پانی، تعلیم، صحت اور روزگار جیسی بنیادی سہولیات کی فراہمی ابھی بھی ناگزیر ہے۔ انہوں نے مزید کہا کہ ہم این ڈی ایف کے کام سے بہت متاثر ہیں اور مستقبل میں بھی این ڈی ایف کے ساتھ مل کر کام جاری رکھیں گے تاکہ زیادہ سے زیادہ لوگوں تک امداد اور سہولیات پہنچائی جا سکیں۔مقامی دیہاتیوں کی جانب سے التزام ریلیف سوسائٹی ملائیشیا اور این ڈی ایف کی کوششوں کا شکریہ ادا کیا گیا اور ان کی امداد کو قدر کی نگاہ سے دیکھا گیا۔
