ڈی پی او مانسہرہ شفیع اللہ گنڈا پور کا تھانہ بالاکوٹ، پولیس پوسٹ اور ٹوریسٹ فیسیلیٹیشن سنٹر ڈمگلہ کا دورہ
ڈسٹرکٹ پولیس آفیسر مانسہرہ شفیع اللہ گنڈا پور نے تھانہ بالاکوٹ، اس سے ملحقہ پولیس پوسٹ ڈمگلہ اور ٹوریسٹ فیسیلیٹیشن سنٹر ڈمگلہ کا دورہ کیا۔ اس موقع پر ڈی پی او مانسہرہ کے ہمراہ ڈی ایس پی بالاکوٹ صداقت نثار اور ایس ایچ او بالاکوٹ فہد شاہ بھی موجود تھے۔
دورے کے دوران ڈی پی او مانسہرہ نے تھانہ اور چوکی کی عمارت، فرنٹ ڈیسک، رہائشی بیریکس ، سیکیورٹی ،دستیاب سہولیات اور جاری تعمیراتی کام کا تفصیلی جائزہ لیا۔ انہوں نے موقع پر موجود پولیس نفری سے ملاقات کی اور ان کے مسائل سن کر انکو حل کیا اور ڈیوٹی کی انجام دہی سے متعلق مناسب احکامات بھی جاری کیے۔
ڈی پی او مانسہرہ نے ڈمگلہ کے مقام پر قائم ٹوریسٹ فیسیلیٹیشن سنٹر کا بھی تفصیلی جائزہ لیا اور وہاں تعینات افسران کو ہدایت کی کہ سیاحوں کو بہترین رہنمائی اور خدمات فراہم کی جائیں تاکہ مانسہرہ آنے والے ملکی و غیر ملکی سیاحوں کا اعتماد مزید مضبوط ہو۔
انہوں نے کہا کہ مانسہرہ کے خوبصورت سیاحتی مقامات کا آغاز بالاکوٹ سے ہوتا ہے، جہاں سے تقریباً تمام سیاحوں کا گزر ہوتا ہے، لہٰذا ان علاقوں میں سیاحوں کو مؤثر، محفوظ اور آسان سہولیات فراہم کرنا مانسہرہ پولیس کی اولین ترجیحات میں شامل ہے۔
