مظفرآباد: آزاد کشمیر میں طوفانی بارشیں ہونے کے ساتھ ساتھ کلاؤڈبرسٹ کا واقعہ بھی پیش آیا ہے جس میں 3 خواتین جاں بحق ہوگئیں۔
ایس ڈی ایم اے نے بتایا کہ بلگراں میں کلاؤڈبرسٹ سے 3 خواتین جاں بحق ہوئیں، 2 خواتین موقع پر ہی دم توڑگئیں، اس کے علاوہ کلاؤڈبرسٹ کی زد میں آکر شدید زخمی ہونے والی ایک خاتون اسپتال میں انتقال کرگئی۔
75سالہ جلال الدین تاحال لاپتہ ہے جس کی تلاش جاری ہے، تحصیل پٹہکہ میں کلاؤڈبرسٹ کے2 حادثات ہوئے ہیں۔
ایس ڈی ایم اے نے بتایا کہ واقعات میں بلگراں اور کھیتر کے کئی گھروں کو نقصان پہنچا، متاثرین کو محفوظ مقام پر منتقل کردیا گیا ہے۔
کلاؤڈبرسٹ کیا ہے؟
محکمہ موسمیات کے جاری کردہ بیان کے مطابق کلاؤڈ برسٹ کو رین گش اور رین گسٹ بھی کہا جاتا ہے، کسی علاقے میں مختصر وقفے میں شدید بارش ہوجائے تو اسے کلاؤڈ برسٹ کہا جاتا ہے، یعنی مخصوص علاقے میں ایک گھنٹے میں کم سے کم 200 ملی میٹر بارش ریکارڈ کی جائے تو اسے کلاؤبرسٹ کہا جائے گا۔
کلاؤڈبرسٹ مختصر وقفے کے لیے رونما ہوتا ہے، کلاؤبرسٹ گرج چمک اور شدید برقی سرگرمی کی وجہ بنتا ہے، اس میں عموماً بادل کے نیچے کی ہوا اوپر اٹھتی ہے اور پانی کے قطروں کو کچھ دیر گرنے سے روکتی ہے۔
ان بادلوں میں جیسے ہی ہوا کا دباؤ کم ہوتا ہے پانی کی بڑی مقدار بادل سے گرتی ہے اور یوں بادلوں کا پانی گویا اس طرح بہتا ہے کہ کسی نے پانی سے بھری بالٹی الٹ دی ہو۔
کلاؤڈبرسٹ کے زیادہ ترواقعات پہاڑی علاقوں میں رونما ہوتے ہیں، جب پانی کی بڑی مقدار نیچے گرتی ہے تو سیلابی کیفیت پیدا ہوجاتی ہے اور اس کے بہاؤ میں آبادی اور فصلوں کا بہت نقصان ہوسکتا ہے۔
=======================
مئی بن گیا دسمبر، پاکستان میں برفباری ہونے لگی
مئی کے مہینے میں پاکستان میں گرمی اپنے جوبن پر ہوتی ہے بالائی علاقوں میں بھی سردی رخصت ہو جاتی ہے لیکن آج وادی کاغان میں برفباری ہوئی ہے۔
اے آر وائی نیوز کے مطابق مئی کے مہینہ ہر سال پاکستان کے گرم ترین مہینوں میں شمار ہوتا ہے۔ جہاں اس ماہ میدانی علاقے تپتے صحرا بنے ہوتے ہیں، وہیں برف پوش بالائی علاقوں میں بھی گرمی دستک دے دیتی ہے اور گلیشیئر پگھلنے لگتے ہیں۔
تاہم آج وادی کاغان کے مشہور سیاحتی مقام بابو سر ٹاپ بیسر پر برفباری نے اہل علاقہ کو بھی حیران کر دیا ہے۔
موسم گرما میں برف کے گالے روئی کی طرح آسمان سے زمین پر گرتے دیکھ کر مقافی افراد حیران تو سیاحوں کی موجیں ہو گئیں اور وہ خوب لطف اندوز ہوئی۔
اس اچانک غیر متوقع برف باری سے وادی کاغان اور ناران کا موسم ایک بار پھر سرد ہو گیا ہے۔ دوسری جانب مقامی پولیس کے جوان برفباری کے دوران سیاحوں کی مدد کے لیے موجود ہیں۔
دریں اثنا شانگلہ، کوٹلی آزاد کشمیر سمیت کے پی کے متخلف علاقوں میں آج گرج چمک کے ساتھ بارش ہو رہی ہے۔
