لاہور: انٹرنیشنل تھیلیسیمیا ڈے کے موقع پر پنجاب اسمبلی میں سندس فاؤنڈیشن کے زیر اہتمام سیمینار کا انعقاد کیا گیا جس میں مختلف شعبہ ہائے زندگی سے تعلق رکھنے والے افراد، تعلیمی اداروں کے طلبا و طالبات، سماجی کارکنان اور ماہرین صحت نے شرکت کی۔
سیمینار کے مہمانِ خصوصی چئیرمین پبلک اکاؤنٹس کمیٹی پنجاب، سید علی حیدر گیلانی تھے جنہوں نے تقریب سے خطاب کرتے ہوئے تھیلیسیمیا پریوینشن بل کی اہمیت پر روشنی ڈالی۔ انہوں نے بتایا کہ یہ بل انہوں نے خود پنجاب اسمبلی میں پیش کیا تاکہ اس موذی مرض سے بچاؤ کے لیے مؤثر قانون سازی کی جا سکے۔اپنے خطاب میں سید علی حیدر گیلانی نے سندس فاؤنڈیشن کی خدمات کو زبردست خراجِ تحسین پیش کرتے ہوئے کہا کہ سندس فاؤنڈیشن تھلیسیمیا اور
خون کی دیگر بیماریوں میں مبتلا بچوں کے لیے جو کام کر رہی ہے وہ قابلِ ستائش ہے۔ یہ ادارہ نہ صرف مفت علاج بلکہ مریضوں اور ان کے اہلِ خانہ کو ذہنی و جذباتی سپورٹ بھی فراہم کر رہا ہے۔ حکومت پنجاب کو بھی ایسے اداروں سے تعاون بڑھانا چاہیے تاکہ زیادہ سے زیادہ بچوں کی زندگیاں بچائی جا سکیں۔
تقریب سے چئیرپرسن ویمن پروٹیکشن اتھارٹی پنجاب، محترمہ حنا پرویز بٹ نے بھی خطاب کیا اور تھیلیسیمیا سے متاثرہ بچوں اور ان کے خاندانوں کے لیے سندس فاؤنڈیشن کی خدمات کو سراہا۔
سیمینار میں تھیلیسیمیا ہیروز نے بھی اپنی زندگی کی جدوجہد اور حوصلے کی داستانیں سنائیں، جو حاضرین کے لیے نہایت متاثرکن رہیں۔
سندس فاؤنڈیشن کے پیٹرن سہیل وڑائچ اور صدر یاسین خان نے بھی سیمینار سے خطاب کرتے ہوئے ادارے کی خدمات، تھیلیسیمیا کی روک تھام، اور خون کی بروقت فراہمی جیسے اہم موضوعات پر روشنی ڈالی۔
