ریاض میں “کنیکٹڈ پاکستان” سیمینار کا انعقاد، پاکستانی کمیونٹی کی بھرپور شرکت
ریاض (۔ناظم علی ) — فرینڈز آف ریاض کے زیر اہتمام “کنیکٹڈ پاکستان” کے عنوان سے ایک اہم سیمینار کا انعقاد کیا گیا جس میں پاکستانی کمیونٹی کے اراکین، سفارتخانہ پاکستان کے افسران، اور میڈیا سے وابستہ افراد نے بڑی تعداد میں شرکت کی۔
سیمینار کا مقصد سعودی عرب میں موجود پاکستانیوں کو مقامی قوانین سے آگاہی فراہم کرنا اور سعودی عرب و پاکستان کے درمیان کاروباری مواقع، آئی ٹی، کنسٹرکشن اور دیگر شعبوں میں تعاون کے امکانات پر تبادلہ خیال کرنا تھا۔
تقریب کے مہمان خصوصی معروف مذہبی اسکالر مولانا عبدالمالک مجاہد، مجلس پاکستان و یوتھ فورم کے سرپرست سید ثاقب زبیر، اور سعودی عرب میں تعینات منسٹر اف ٹریڈ ڈاکٹر شگفتہ زرین نے اپنے خطابات میں اس کاوش کو سراہا اور دونوں ممالک کے درمیان مضبوط روابط کو وقت کی ضرورت قرار دیا۔
دیگر مہمانوں میں رانا عمر فاروق،قاضی اسحاق میمن، افنان خاور، ڈاکٹر اویس سلفی، سلمان قریشی، حاجی پرویز خان، ملک عثمان، رانا یاسر غفور، محمد عمران یونس، شکیل کیانی سمیت اہم پاکستانی کمیونٹی کے افراد نے شرکت کی
فرینڈز آف ریاض کے متحرک اراکین رانا عظیم یونس،وقاص احمد، حسیب گوندل، حمزہ عباس، عمران اعوان اور کامران اشرف نے بھی خطاب کرتے ہوئے کمیونٹی کو درپیش مسائل اور ان کے حل پر روشنی ڈالی۔ مقررین نے کہا کہ ایسے پلیٹ فارمز نہ صرف کمیونٹی کو جوڑنے میں اہم کردار ادا کرتے ہیں بلکہ پاکستان کے مثبت تشخص کو اجاگر کرنے میں بھی مددگار ثابت ہوتے ہیں۔
شرکاء نے اس سیمینار کو ایک کامیاب اور معلوماتی پروگرام قرار دیا اور مستقبل میں اس طرح کے مزید پروگراموں کے انعقاد کی امید ظاہر کی۔
