سرسیدیونیورسٹی کے زیرِ اہتمام بین الاقوامی پروجیکٹ ایکٹو کی پیشرفت کا جائزہ لینے کے لیے ایک سیشن کا انعقاد۔
اسپین کی مالاگا یونیورسٹی کے ڈاکٹر اینرک ناوا نے صلاحیت سازی کے پروگرام کو کامیابی سے مکمل کرنے پر سرسید یونیورسٹی کی کوششوں کو سراہا۔
کراچی، 14/ اپریل، 2025 – سرسید یونیورسٹی آف انجینئرنگ اینڈ ٹیکنالوجی میں ACTIVE پروجیکٹ کی پیش رفت کا جائزہ لینے کے لیے ایک سیشن ہوا۔شرکاء میں اسپین کی مالاگا یونیورسٹی کے ڈاکٹر اینریک ناوا، سرسید یونیورسٹی کے چانسلر محمد اکبر علی خان، وائس چانسلر ڈاکٹر سید جعفر نذیر عثمانی، رجسٹرار کموڈور (ر) سید سرفراز علی، مسز ارم اکبر سمیت روسائے کلیات، سربراہانِ شعبہ جات اور فیکلٹی ممبران شامل تھے۔
سیشن سے خطاب کرتے ہوئے، اسپین کی مالا گا یونیورسٹی کے وائس چانسلر برائے موبیلیٹی اور بین الاقوامی امور ڈاکٹر اینریک ناوا نے صلاحیت سازیCapacity Building کے پروگرام کو کامیابی سے مکمل کرنے پر سرسید یونیورسٹی کی تعریف کرتے ہوئے کہا کہ مقررہ مدت میں ٹاسک مکمل کرنے پر پوری ٹیم تعریف کی مستحق ہے۔ ACTIVE پروجیکٹ کا مقصد نہ صرف ماحول کی حفاظت ہے بلکہ ہر ایک کے لیے پائیدار مستقبل کو یقینی بنانے کے لیے اگلی نسل کو ضروری آلات سے آراستہ کرنا ہے۔نامکمل منصوبوں کے لیے فنڈز کی منتقلی کا طریقہ کار وضع کیا جارہاہے تاکہ اس ضمن میں جاری سرگرمیوں کو حتمی شکل دینے کے لیے سرسید یونیورسٹی کو وسائل مختص کیے جا سکیں۔ اس کے علاوہ، ہم مختلف دیگر اقدامات میں بھی مصروف ہیں۔ ACTIVE پروجیکٹ کے ذریعے، نوجوانوں کو موسمیاتی تبدیلیوں سے اپنے آپ کو محفوظ رکھنے کی تربیت فراہم کی جائے گی، جو انہیں ایک پائیدار مستقبل کے حصول کے لیے ضروری مہارتوں سے لیس کریں گے۔
اس تقریب کے دوران، ڈاکٹر اینریک ناوا نے مالاگا یونیورسٹی کے بارے میں ایک معلوماتی پریزنٹیشن دی۔
اس موقع پر سرسید یونیورسٹی کے چانسلر محمد اکبر علی خان نے اس بات پر زور دیا کہ سرسید یونیورسٹی انجینئرز کی ایک نئی نسل تیار کررہی ہے جو پاکستان کو درپیش ماحولیاتی اور موسمی چیلنجوں سے نمٹنے اور ان پر قابو پانے میں کلیدی اور موثر کردار ادا کرے گی۔ تیزی سے بدلتی ہوئی دنیا میں، ہمارے سیارے کا مستقبل نہ صرف تکنیکی ترقی بلکہ ماحولیاتی مسائل کے بارے میں ہماری آگاہی کو اس سے ہم آہنگ کرنے سے منسلک ہے۔۔ ACTIVE پروجیکٹ کے ذریعے، ہمارا مقصد ایسے جدید اور پائیدار حل کو فروغ دینا ہے جس سے نہ صرف ہماری کمیونٹیز بلکہ پوری دنیا کو فائدہ پہنچے گا۔
وائس چانسلر ڈاکٹر سید جعفر نذیر عثمانی نے کہا کہ ACTIVE پراجیکٹ اس معاشرے کی تشکیل میں اہم کردار ادا کرے گا اور ہم پائیداری اور ٹیکنالوجی کے امتزاج کے نتیجے میں ایک خوشگوار ماحول میں زندگی گزاریں گے۔ ہم ماحولیاتی اور موسمی چیلنجوں سے نمٹنے کے لیے ICT کی طاقت کو بروئے کار لانے کے لیے پرعزم ہیں۔
قبل ازیں، ڈین فیکلٹی آف الیکٹریکل اینڈ کمپیوٹر انجینئرنگ، پروفیسر ڈاکٹر محمد عامر نے ایکٹیو پروجیکٹ پر ایک جامع پریزنٹیشن دی جس میں اس کی پیشرفت نمایاں تھی۔ انہوں نے کہا کہ صلاحیت سازی کے تربیتی سیشن مکمل ہو چکے ہیں۔ ماسٹرز پروگرام کی منظوری کے لیے متعلقہ ادارے میں این او سی جمع کرادیاگیا ہے۔ مزید برآں، تحقیقی مراکز کے قیام کا کام جاری ہے، اور اہم آلات کے حصول کے احکامات جاری کر دیے گئے ہیں۔
عبدالحامد دکنی
ڈپٹی ڈائریکٹر انفارمیشن
کیپشن: سرسید یونیورسٹی کے چانسلر محمد اکبر علی خان، اسپین کی مالاگا یونیورسٹی کے ڈاکٹر اینرک ناوا کو یونیورسٹی کا سوونیئر پیش کررہے ہیں۔(دائیں سے بائیں) رجسٹرار سید سرفراز علی، وائس چانسلر ڈاکٹر سید جعفر نذیر عثمانی، مسز ارم اکبر اور پروفیسر ڈاکٹر محمد عامر بھی اس موقع پر موجود ہیں۔
